Մտահոգիչ է, որ դելիմիտացիայի ու դեմարկացիայի վերաբերյալ փաստաթուղթ ստորագրելու պրոցեսը կոնֆիդենցիալ է, ամեն ինչ արվելու է փակ
ՔԱՂԱՔԱԿԱՆՈՒԹՅՈՒՆ
Վարչապետը հայտսրարել է, եր սահմանագծման ու սահմանազատման գործընթացի նախապատրաստական աշխատանքների մասին ռուսական կողմի առաջարկները հայկական կողմն ընդունելի է համարել:
Երկու օր առաջ էլ «Քաղաքացիական պայմանագիր» խմբակցության անդամները հայտարարեցին, թե սահմանազատումն ու սահմանագծումը պետք է սկսվեն զրոյական կետից:
Այս մասին զրուցել ենք քաղաքագետ Բենիամին Պողոսյանի հետ։
Հարցին, թե ինչ է նշանակում այս ամենը քաղաքագետն ասաց. «Ճիշտն ասած՝ ինձ համար մի փոքր անհասկանալի է, թե ինչ է նշանակում զրոյական կետ, որովհետև դելիմիտացիան ու դեմարկացիան հստակ գործընթաց են: Կան միջազգային չափորոշիչներ, կա ԵԱՀԿ-ի հրապարակած ծավալուն փաստաթուղթ, թե ինչպես պետք է պետությունների միջև դելիմիտացիա և դեմարկացիա անցկացվեն: Հիմա մեզ հայտնի չէ՝ ինչ չափանիշների հիման վրա են անցկացնելու այդ գործընթացը, բայց հստակ է այն, որ այդ գործընթացը պետք է հիմնված լինի որոշակի չափանիշների վրա: Իսկ զրոյական կետ ասելը ես պատկերացնում եմ, որ Ադրբեջանի և Հայաստանի միջև դելիմիտացիա, դեմարկացիա չեն անցկացվել, և նոր պետք է սկսվի այդ գործընթացը»:
Անդրադառնալով այն հանգամանքին, որ խմբակցությունում չգիտեն՝ ի՛նչ քարտեզների, ի՛նչ փաստաթղթերի հիման վրա է լինելու գործընթացը Բենիամին Պողոսյանն ասաց. «Երեկվանից նույն իշխանական շրջանակներից հայտարարվում է, թե պրոցեսը կոնֆիդենցիալ է, ամեն ինչ արվելու է փակ: Ա՛յ դա է մտահոգիչ, որովհետև վերջին հաշվով բոլորս էլ սպասում էինք, և ակնհայտ էր, որ կա պայմանավորվածություն նոյեմբերի 8-12-ը Մոսկվայում անցկացնել եռակողմ հանդիպում և դելիմիտացիայի ու դեմարկացիայի վերաբերյալ փաստաթուղթ ստորագրել: Պարզ է, որ եթե նախագահների մասնակցությամբ օնլայն ձևաչափով հանդիպումը լիներ, փաստաթուղթը գաղտնի չէր լինի: Կարող է փակ հատվածներ ունենար, բայց ինչ-որ բան պետք է հրապարակվեր: Այդ հանդիպումը չկայացավ, ամենայն հավանականությամբ՝ հայկական կողմի խնդրանքով կամ հետաձգվեց, կամ չեղարկվեց: Հետո մենք տեսանք կտրուկ զարգացումներ՝ մաքսակետեր Գորիս-Կապան ճանապարհին, նոյեմբերի 14-ին առանց որևէ դիմադրության դիրքերի հանձնում Ադրբեջանին, նոյեմբերի 15-ին մաքսակետի տեղադրում Կապան-Ճակատեն հատվածում, իսկ նոյեմբերի 16-ին զինված բախում: Այդքանից հետո Հայաստանի վարչապետը հայտարարեց, որ ռուսական կողմի առաջարկները մեզ համար ընդունելի են: Մենք այս ամենից կարող ենք եզրակացնել, որ ռուսական կողմի առաջարկները դժվար թե տարբերվեն այն փաստաթղթից կամ նախագծի տեքստից, որը նախատեսվում էր ստորագրել Մոսկվայում, օնլայն հանդիպման ժամանակ: Արդյունքում ստացվում է, որ երկու շաբաթվա ընթացքում տեղի ունեցած իրադարձությունների հետևանքով մենք ունենում ենք դելիմիտացիայի և դեմարկացիայի գործընթացի մեկնարկ: Բայց այս պարագայում, փաստորեն, գաղտնի են պահվում պայմանները՝ ինչպես է անցկացվելու գործընթացը»:
Սոնա Գիշյան
