Հրաձգություն ներխուժմամբ. Ադրբեջանը «կծում» է դիրքեր հայկական սահմանից
ՀԱՍԱՐԱԿՈՒԹՅՈՒՆ
politexpert.net-ը գրում է, որ օրերս Բաքուն Երևանին տեղեկացրել է, որ մաքսային և սահմանային հսկողություն է սահմանում Հայաստանը Իրանին կապող ճանապարհի Ադրբեջանի տարածքում (Բաքվի վարկածով)։ Գործնականում դա նշանակում է այդ ճանապարհի փաստացի փակում: Երևանի պաշտոնյաները հայտարարել են, որ այլընտրանքային ճանապարհն արդեն պատրաստ է, սակայն ըստ փորձագետների Հայաստանը Իրանի հետ կապող նոր երթուղին ձմռանը դժվարանցանելի է և դժբախտ պատահարների տեսանկյունից պակաս անվտանգ։ Հայաստանի ԱԱԾ-ն հայտարարություն է տարածել, որում նշել է, որ հայկական կողմը նշված ճանապարհին հայելային սահմանային և մաքսային հսկողության կետեր կստեղծի։ Բայց «հայելային պատասխանի» իմաստը լիովին պարզ չէ, քանի որ ադրբեջանցիները չեն օգտվում այդ ճանապարհից։
Եվ դա վերջը չէ: Հերթական միջադեպն է տեղի ունեցել առողջարանային Ջերմուկ քաղաքի մոտ. այնտեղ է գտնվում Հայաստանի տարածքի ամենանեղ հատվածը, որը բաժանում է Ադրբեջանի արևմտյան շրջանները Նախիջևանի ինքնավարությունից։ Բաքուն փորձում է ավելի նեղացնել այդ տարածքը, ինչպես նաև վերահսկողություն հաստատել Հայաստան-Իրան միջպետական նոր ճանապարհի վրա, այդ թվում զրահատեխնիկայի օգնությամբ։ Անվտանգության խորհրդի արտահերթ նիստ հրավիրելով՝ Փաշինյանը մեղադրել է Ադրբեջանին Հայաստանի տարածք ներխուժելու փորձի մեջ։ Բաքվում, իրենց հերթին, տեղի ունեցածն անվանել են սադրանք և տարածել են տեսագրություններ, որոնցում, ըստ իրենց վարկածի, ադրբեջանական զինուժը նոր դիրքեր է գրավում, որտեղ նախկինում տեղակայված են եղել հայկական դիրքերը։
Փորձագետները համակարծիք են, որ Բաքվի գործողությունները բացատրվում են նրանով, որ պաշտոնական Երևանը հրաժարվում է Հայաստանի տարածքով Նախիջևանին «ինքնիշխան միջանցք» տրամադրել։ Այդ գաղափարը Հայաստանում չափազանց անընդունելի է։ Սա գիտակցելով Փաշինյանի կառավարությունը բազմիցս հայտարարել է, որ Ադրբեջանի հետ հաղորդակցությունների ապաշրջափակման բանակցություններում «միջանցքային տրամաբանություն» չկա և չի էլ կարող լինել։
Այսպիսով, Ադրբեջանի նախագահ Իլհամ Ալիևը ընտրել է հայ հասարակության վրա աստիճանական ճնշում գործադրելու մարտավարությունը, որպեսզի, հոգնած այդ սահմանամերձ շրջանում ադրբեջանական դիրքերի առաջխաղացման մասին մշտական հաղորդագրություններից և սեփական տարածքում տեղաշարժի նոր դժվարություններից Հայաստանը ի վերջո հաշտվի միջանցքի տրամադրման մտքի հետ։ Ավելի վաղ Ալիևն ասել էր, որ եթե Հայաստանը կամավոր «միջանցք» չտրամադրի Բաքվին Ադրբեջանը ուժով այն կվերցնի։ Վարչապետին ընդդիմադիր դաշինքը հանրապետության նախկին նախագահ Ռոբերտ Քոչարյանի գլխավորությամբ, հայտարարել է. «Ադրբեջանական կողմի պահվածքը ցույց է տալիս, որ իրականում հայ ժողովրդից թաքուն, ի վնաս պետական շահերի ապօրինի սահմանազատում է իրականացվում իշխանությունների հանցավոր անգործությամբ կամ համաձայնությամբ»։
Նյութը հրապարակման պատրաստեց Կամո Խաչիկյանը
