Իրանը և Հայաստանը կստեղծեն համատեղ արդյունաբերական պարկ
ՀԱՍԱՐԱԿՈՒԹՅՈՒՆ
iran.ru-ն գրում է, որ Իրան-Հայաստան համատեղ առևտրաարդյունաբերական պալատի ղեկավարը հայտարարել է, որ երկու երկրները նախատեսում են մոտ ապագայում ստեղծել համատեղ արդյունաբերական պարկ: Այդ մասին գրել է Իրանի Առևտրի, արդյունաբերության, հանքարդյունաբերության և գյուղատնտեսության պալատի կայքը։
Էրվիկ Յարիջանյանն ասել է, որ երկու կողմերն ունեն նաև համագործակցության ներուժ այնպիսի այլ ոլորտներում, ինչպիսիք են բանկայինը, ֆինանսականը, գյուղատնտեսությունը և արտաքին գյուղատնտեսությունը։ «Մենք բանակցում ենք Հայաստանի իշխանությունների հետ երկու կողմերի գործարարների համար անհրաժեշտ հիմքեր ստեղծելու, ներդրումներ անելու և միասին ապրանքներ արտադրելու համար, որպեսզի մուտք ապահովվի դեպի ավելի հեռավոր շուկաներ, ինչպիսիք են Եվրոպան և Կանադան, - ասել է նա,- ներկայումս եվրոպական մի քանի երկրների և Կանադայի միջև արտոնյալ սակագինը Հայաստանի հետ կազմում է չորս տոկոս, և այդ իրավիճակում, եթե Իրանի և Հայաստանի ներդրումներով համատեղ արտադրանք արտադրվի և արտահանվի այդ շուկաներ, այն փաստացի կլինի երկկողմանի շահավետ»։
Անդրադառնալով մի քանի շաբաթ առաջ Իրանի առևտրային պատվիրակության և Հայաստանի էկոնոմիկայի նախարարի հանդիպմանը Յարիջանյանն ասել է. «Հայաստանի էկոնոմիկայի նախարարը ողջունել է երկու երկրների միջև առևտրային հարաբերությունների զարգացումը և նախատեսում է մոտ 50 հեկտար հող հատկացնել ստեղծվելիք համատեղ արդյունաբերական պարկի համար»։
«Իրանի արդյունաբերական գոտիները, համագործակցելով Հայաստանի արդյունաբերական պարկերի հետ, մտադիր են ստեղծել համատեղ արդյունաբերական գոտի, ինչը կարող է հանգեցնել Իրանի Իսլամական Հանրապետությունից տեխնոլոգիաների և կապիտալի փոխանցմանը, ինչպես նաև ապրանքների վերամշակմանը և արտահանմանը Հայաստանից»,- պարզաբանել է նա։
Նշելով, որ ներկայումս Իրան-Հայաստան առևտրի զարգացման համար առանձնահատուկ խնդիրներ չկան, նա ասել է. «Վերջին տարիներին Իրան-Հայաստան առևտրի խնդիրն այն էր, որ երկու երկրների առևտրաշրջանառությունը մեծապես հիմնված է էներգառեսուրսների փոխանակման վրա։ Այսինքն Իրանի Իսլամական Հանրապետությունը Հայաստանից էլեկտրաէներգիա է ստացել գազի արտահանման դիմաց։ Բայց հաշվի առնելով այն հանգամանքը, որ Հայաստանի կառավարությունն արգելել է ավելի քան 1000 ապրանքատեսակների ներմուծումը Թուրքիայից, այժմ պայմանները շատ ավելի բարենպաստ են երկու երկրների միջև առևտրի զարգացման և դեպի Հայաստան իրանական արտահանման ծավալների ավելացման համար»։
Նյութը հրապարակման պատրաստեց Կամո Խաչիկյանը
