Սատանովսկին մեկնաբանել է արմատական հայերի ռուս խաղաղապահների վրա հարձակվելու սպառնալիքները
ՀԱՍԱՐԱԿՈՒԹՅՈՒՆ
mk.ru-ն գրում է, որ ռուս գիտնական և քաղաքագետ Եվգենի Սատանովսկին ասել է, որ Հայաստանի արմատականները սկսել են սպառնալ հարձակվել ռուս խաղաղապահների վրա, եթե նրանք Հայաստանի քաղաքացի Նորայր Միրզոյանին, ով նռնակ էր նետել ադրբեջանցի զինծառայողների ուղղությամբ արտահանձնեն Ադրբեջանին։ Այս միջադեպի արդյունքում վիրավորվել են սերժանտ Հաֆիզ Նասիբովը և ևս երկու ադրբեջանցի զինծառայող։ «Ղարաբաղում ադրբեջանցի զինվորականների վրա նռնակ նետած հայի ձերբակալության հետ կապված միջադեպը, որն ուղեկցվում է հայ արմատականների սպառնալիքներով առ այն, որ հարձակումներ կսկսեն ռուս խաղաղապահների վրա, եթե նրան արտահանձնեն Ադրբեջան, ավելի քան ցուցադրական է», - ասել է Սատանովսկին։ Հեռագրային ալիքը նաև հիշեցրել է, որ Ղարաբաղյան երկրորդ պատերազմի ավարտի տարելիցի օրը ուլտրաազգայնական հայերը ցույց էին կազմակերպել Ռուսաստանի դեսպանատան դիմաց մեղադրելով Մոսկվային։ Միաժամանակ Սատանովսկին արդարացված է անվանել ադրբեջանական կողմի այն մտավախությունը, որ եթե նռնակը նետած տղամարդուն հանձնեն Երևանին, ապա նա կմնա ազատության մեջ։ «Սկզբունքորեն, հրադադարը խախտողին, որի երաշխավորը Ռուսաստանն է, պետք է տեղում վերացնել, և էական չէ, թե ո՞վ է նա»,- կարծիք է հայտնել քաղաքագետը։ Սատանովսկին հավելել է, որ ցանկացած խմբավորում, ինչ կողմնորոշման էլ որ լինի, եթե հարձակվի ռուս խաղաղապահների վրա, նույնպես պետք է ոչնչացվի։ «Նման ելքը պետք է լինի անխուսափելի իրողություն,և հայտնի լինի բոլորին աշխարհում և տարածաշրջանում»,- ասել է փորձագետը հավելելով, որ, իր կարծիքով, այս դեպքում այլ միջոցները չեն աշխատի։ Նա խոստովանել է, որ դրա համար կարող է անհրաժեշտ լինի տարածաշրջանը վերցնել ուժային խիստ վերահսկողության տակ, ինչը կատարել են և՛ Ռուսական կայսրությունը, և՛ Խորհրդային Միությունը։ Սատանովսկու խոսքով ամեն ինչ փլուզվում է, քանի որ Մոսկվան դադարել է դա անել։ Նա կարծիք է հայտնել, որ Ադրբեջանը արդեն մտել է թուրքական ազդեցության գոտի, քանի որ Անկարան ոչ թե «խոսել է եղբայրական ժողովուրդներ մասին», այլ օգնել է ուժով վերանվաճել Ղարաբաղը։ Սատանովսկին նաև նշել է, որ ոչ ոք Ռուսաստանին շնորհակալություն չի հայտնի Ղարաբաղի հայ բնակչության մնացորդները փրկելու համար։ «Ինչքան ինչ որ մեկի համար ես արել ու ինչ որ մեկին ինչ որ բան տվել, այնքան քեզ մեղադրում են, որ քի՛չ ես արել, քի՛չ ես տվել»,- նկատել է քաղաքագետը։ «Արդյունքում մենք ունենք այն, ինչ ունենք», - եզրափակել է գիտնականը:
Նյութը հրապարակման պատրաստեց Կամո Խաչիկյանը
