ԵԽԽՎ. Հայաստանը հաջողությամբ հաղթահարել է քաղաքական ճգնաժամը

Tass.ru-ն գրում է, որ Հայաստանը հաջողությամբ հաղթահարել է Ղարաբաղյան 2-րդ պատերազմում կրած պարտությանը հաջորդած քաղաքական ճգնաժամը։ Այս մասին ասված է հանրապետության պարտավորությունների մոնիտորինգի վերաբերյալ ԵԽԽՎ զեկույցում. «Հայաստանը հաջողությամբ դուրս է եկել Լեռնային Ղարաբաղի հակամարտությունում իր պարտության հետևանքով առաջացած լուրջ քաղաքական ճգնաժամից, ինչն ինքնին իսկական հաջողություն է»։

Բանախոսները կարծում են, որ ճգնաժամը հանգուցալուծվել է արտահերթ ընտրությունների արդյունքում «կազմակերպված ժողովրդավարական ճանապարհով՝ չնայած խիստ բևեռացված միջավայրին»։ «Այդ բևեռացումը, ցավոք, առկա է Ազգային ժողովում և չի նպաստում խորհրդարանական ճշմարիտ մշակույթի կայացմանը, որտեղ հավատարիմ մնալով տարբեր քաղաքական կողմնորոշումներին մեծամասնությունն ու ընդդիմությունը դիմակայում են միմյանց կառուցողական և հարգալից կերպով»,- նշել են ԵԽԽՎ-ում։

Մյուս կողմից հայտարարության մեջ ընդգծվել է , որ «պարզ է, որ ստեղծվում են ինստիտուցիոնալ հավասարակշռություններ, և որ կան որոշակի հակակշիռներ, ինչպիսիք են մարդու իրավունքների պաշտպանությունը»։ «Մենք կարող ենք միայն կոչ անել Հայաստանի իշխանություններին շարունակել այդ ճանապարհը և, անհրաժեշտության դեպքում, ապահովել այլ ինստիտուտների անկախությունը, օրինակ՝ Կոռուպցիայի կանխարգելման հանձնաժողովին սահմանադրական կարգավիճակ տալով»,- ասված է փաստաթղթում։

Խոսելով հայաստանյան պետական ​​համակարգի առկա խնդիրների մասին բանախոսներն ուշադրություն են հրավիրում դատաիրավական համակարգի և հենց իշխանությունների նկատմամբ բնակչության վստահության ցածր մակարդակի վրա, ինչը պահանջում է խորը բարեփոխումներ համակարգը եվրոպական չափանիշներին հասցնելու, ինչպես նաև « ԶԼՄ-ներում ապատեղեկատվության աննախադեպ մակարդակը» կանխելու համար, ինչը իշխանությունը կարող է գայթակղել խստացնել խոսքի ազատության սահմանները և տուգանքներ սահմանել տարբեր վիրավորանքների համար, բայց որը, ընդհակառակը, կարող է է՛լ ավելի խարխլել մամուլի կարգավիճակը։