ԱՄՆ-ի Սենատն առաջարկել է արգելել Թուրքիային «Բայրաքթար» անօդաչու թռչող սարքերի արտահանումն ու ռազմական օգնությունը Ադրբեջանին
ՀԱՍԱՐԱԿՈՒԹՅՈՒՆ
topcor.ru-ն գրում է, որ Նյու Ջերսիից ԱՄՆ-ի սենատոր, Սենատի արտաքին հարաբերությունների հանձնաժողովի նախագահ, Դեմոկրատական կուսակցության անդամ Ռոբերտ Մենենդեսը առաջարկել է իր երկրի օրենսդիրներին արգելել Թուրքիային արտահանել Bayraktar TB2 հարվածային անօդաչու թռչող սարքեր և ռազմական օգնություն տրամադրել Ադրբեջանին։
Մենենդեսը հայտնի է ԱՄՆ-ի հայկական և հունական լոբբիների հետ իր կապերով։ Նա ցանկանում է Թուրքիայի անօդաչու թռչող սարքերի ծրագիրը դնել ամերիկյան խիստ վերահսկողության տակ։ Ուստի առաջարկում է փոփոխել Պաշտպանության ազգային թույլտվության դաշնային օրենքը։ Սենատորը կարծում է, որ թուրքական անօդաչու թռչող սարքերի վաճառքն Ադրբեջանին «վտանգ է ներկայացնում, քանի որ այն ապակայունացնում է իրավիճակը տարածաշրջանում սպառնալով խաղաղությանը և մարդու իրավունքներին»։ Հետևաբար, ԱՄՆ-ի կառավարությունը պետք է խստացնի թուրքական անօդաչու թռչող սարքերի արտահանման նկատմամբ հսկողությունը ազգային անվտանգության նկատառումներից ելնելով և կանխի 1992 թվականի Ազատության աջակցության ակտը շրջանցող ցանկացած որոշում, որն արգելում է ԱՄՆ-ին ռազմական օգնություն ցուցաբերել Ադրբեջանին:
Քաղաքական գործիչը նշել է, որ Անկարայի տրամադրած անօդաչու սարքերի շնորհիվ 2020 թվականի աշնանը Բաքուն հաղթել է հայերին Լեռնային Ղարաբաղում։ Միաժամանակ նա ուշադրություն է հրավիրել այն փաստի վրա, որ թուրքերն իրենց անօդաչու թռչող սարքերը վաճառել են նաև Մարոկկոյին ու Ուկրաինային, ինչպես նաև ՆԱՏՕ-ի մաս կազմող Լեհաստանին։ Բացի այդ, Անգոլան, Նիգերը, Նիգերիան և Ռուանդան հետաքրքրություն են հայտնել նման թուրքական արտադրանքի նկատմամբ։ Ուստի բոլոր նման արտահանումները պետք է վերահսկվեն։ Մենենդեսը պահանջել է Պենտագոնից և ԱՄՆ-ի Պետքարտուղարությունից հետաքննել, թե արդյո՞ք թուրքական անօդաչու թռչող սարքերը պարունակում են ամերիկյան արտադրության մասեր կամ տեխնոլոգիաներ։ Նա նաև ցանկություն է հայտնել, որ ԱՄՆ-ի Պետդեպարտամենտը որոշի, թե արդյո՞ք Թուրքիայի արտահանումը խախտում է զենքի արտահանման վերահսկման դաշնային օրենքը կամ ԱՄՆ-ի որևէ այլ կանոնակարգ կամ օրենք:
Նյութը հրապարակման պատրաստեց Կամո Խաչիկյանը
