Իշխանությունը խոչընդոտում է արդարադատությանը
ՎԵՐԼՈՒԾՈՒԹՅՈՒՆՆԵՐ
Դատական իշխանությունը կոտրելու և գործադիրի կամակատարը դարձնելու քայլերը շարունակվում են։ Նիկոլ Փաշինյանն ու իր կողմնակիցները գործադրում են բոլոր ջանքերը՝ անհնազանդ դատավորներին պատժելու կամ լռեցնելու ուղղությամբ։ Իրենց համար հաճելի վճիռներ ստանալու կամ քաղաքական հակառակորդներին ամեն գնով կալանավորելու առումով փաշինյանական իշխանությունը զգալի առաջընթաց ունի, ամիսներ առաջ ԱԱԾ-ն առգրավեց դատարանների համակարգիչները, որոնց միջոցով գործերը մակագրվում էին տարբեր դատավորների։ Մինչ այդ մի շարք դատավորներ հրաժարվում էին կատարել իշխանության պահանջը և կալանավորել Փաշինյանի հակառակորդներին։ Քրգործ հարուցվեց, հայտարարեցին՝ իբր մակագրման գործընթացում խախտումներ են եղել, համակարգիչներն առգրավեցին, ինչից հետո մակագրումները սկսեցին իրականացվել ձեռքով։ Արդյունքում, կալանավորումների վերաբերյալ բոլոր գործերը քննում են երկու-երեք դատավորներ, որոնք տասնամյակներ շարունակ կատարել են ցանկացած իշխանության ցանկացած ապօրինի որոշում։
Փաշինյանի կողմնակիցները նաև խոչընդոտում են Ազգային ժողովում արդարադատության հարցով հանձնաժողովի ստեղծմանը։ Երեկ կայացած նիստում «Քաղաքացիական պայմանագիր» խմբակցությունը չքվեարկեց ընդդիմության նախաձեռնությանը։ Ընդդիմությունը ցանկանում է պարզել Արդարադատության նախարարության կողմից դատավորների նկատմամբ կարգապահական վարույթները և օրենքի խախտմամբ գործերի մակագրումները արդյոք խոչընդոտում են արդար դատաքննությանը։ Այս նախաձեռնությունում, սակայն, իշխանությունը հայտարարում է, թե քրեական գործերին միջամտելու վտանգ է տեսնում:
«Հայաստան» խմբակցության պատգամավոր Արամ Վարդևանյանի խոսքով, քննիչ հանձնաժողովն իրավունքի ուժով ստեղծված է, իշխանականների չքվեարկությունը որևէ հետևանք իրենց չի ենթադրում, «Քաղաքացիական պայմանագիրը» որևէ կերպ չի մասնակցելու այդ աշխատանքներին և դրանում ընդդիմադիր խմբակցության պատգամավորը որևէ խնդիր չի տեսնում։ Ադուհանդերձ, իշխող ուժի չմասնակցելն ու հանձնաժողովի՝ ԱԺ շրջանակներում կաշկանդված լինելու հանգամանքը վկայում է, որ քննիչ հանձաժողովը չի ունենա անհրաժեշտ լծակներ՝ ազդելու արդարադատության վրա իշխանության միջամտություններին։ Իսկ Նիկոլ Փաշինյանը՝ գագիկջհանգիրյանների ու կարենանդրեասյանների աջակցությամբ, շարունակելու է վարել և հնձել դատական համակարգը, վերաձևել իր պատկերացումներով, վտանգել ժողովրդավարությունը Հայաստանում։
Արեն Երեմյան
