Մինչ Հայաստանը բացում է, Իրանը Ադրբեջանի ավիացիայի համար փակում է իր օդային տարածքը. քաղտեխնոլոգ
ՔԱՂԱՔԱԿԱՆՈՒԹՅՈՒՆ
Քանի որ ՀՀ իշխանություններն իրենց քաղաքական կուրսը հստակորեն տեղավորել են ադրբեջանաթուրքական և նրանց հետևում կանգնած այլ ուժերի ծիրում, ապա Հայաստանի տարածքով դեպի Նախիջան ադրբեջանական չվերթերը կարելի է դիտարկել որպես հերթական քայլ, Aysor.am-ի թղթակցի հետ զրույցում ասաց քաղտեխնոլոգ Վիգեն Հակոբյանը։
«Ըստ էության՝ Հայաստանը մեսիջ է ուղարկում շահագրգիռ կողմերին, որ համապատասխան սակարկության պայմաններում, այդ թվում՝ Նիկոլ Փաշինյանի իշխանության շուրջ աշխարհաքաղաքական կամ ռեգիոնալ որոշակի կոնսենսուսի պահպանման պամաններում, պատրաստ են քննարկել տարատեսակ տրանսպորտային ուղիների բացումը՝ դա կկոչենք միջանցք, թե մեկ այլ բան։
Միաժամանակ, ակնհայտ է, որ սկսած Ադրբեջանից, վերջացրած մյուս երկրերով՝ որևէ մեկը չի համաձայնելու, որպեսզի այդ ճանապարհի անվտանգությունը վերահսկեն ՀՀ համապատասխան ուժային կառույցները։ Այս պարագայում պարզ է, որ երրորդ երկրի ուժերն են այն պահպանելու», - ասաց Վիգեն Հակոբյանը։
Քաղտեխնոլոգի խոսքով՝ արդեն իսկ փաստ է՝ Հայաստանը մեկ օդային միջանցք տվել է։
«Ուզում եմ հատուկ ուշադրություն հրավիրել, թե ինչ ռեգիոնալ տենդենցների պայմաններում է այս ամենը տեղի ունենում։ Մինչ Հայաստանը բացում է, Իրանը Ադրբեջանի ավիացիայի համար փակում է իր օդային տարածքը։ Այստեղից հստակ երևում է, թե ով որ օրակարգի մեջ է տեղավորված։ Այս առումով Հայաստանն ու Իրանը հակասության մեջ են, և թշնամի պետություններն օգտվում են ՀՀ քաղաքական կուրսից», - ասաց մեր զրուցակիցը։
Ամփոփելով՝ Վիգեն Հակոբյանը կարծիք հայտնեց, որ ՀՀ գործող իշխանությունների շուրջ աշխարհաքաղաքական կոնսենսուսը մոտենում է ավարտին, և ՀՀ իշխանությունները ստիպված են լինելու ընտրություն կատարել ձևավորվող դաշինքների միջև։
«Դատելով այն բանից, որ ՀՀ իշխանությունները քայլ են կատարել՝ ի հակասություն Իրանի՝ իրենք իրենց ընտրությունը կատարել են։ Կամ, ինչպես միշտ, քայլը կատարելուց հետո փորձելու են «կռուտիտ» անելով դրա տակից դուրս գալ, բայց արտաքին ուժերի մոտ, ի տարբերություն ներսի ընտրազանգվածի, այդ խաղերը չեն անցնելու», - ասաց Հակոբյանը։
