Անբավարար գնահատական Նիկոլ Փաշինյանի իշխանությանը

Եվրոպայի խորհրդի հակակոռուպցիոն մարմինը «մեծ հաշվով անբավարար» է գնահատում Հայաստանի իշխանություններին դեռ 5 տարի առաջ ներկայացված առաջարկությունների կատարումը և պահանջում՝ հստակ քայլեր ձեռնարկել ու մինչև մյուս տարվա սեպտեմբերի 30-ը զեկուցել, թե ինչ է արվել հանձնարարականները կատարելու ուղղությամբ։ Այս մարմինը՝ GRECO-ն 5 տարի առաջ, ուսումնասիրելով Հայաստանի խորհրդարանի պատգամավորների, դատավորների ու դատախազների շրջանում կոռուպցիոն ռիսկերը, 18 հանձնարարական էր տվել կառավարությանը։ Նախօրեին հրապարակած արդեն չորրորդ զեկույցում հակակոռուպցիոն մարմինը եզրակացնում է՝ 5 տարիների ընթացքում այդ առաջարկներն իրագործելու համար Հայաստանի իշխանությունները որոշ սահմանափակ քայլեր են կատարել. առաջարկություններից 7-ն իրականացվել են բավարար չափով, մնացած 11-ը՝ մասամբ։

2018թ․ իշխանության գալով՝ Նիկոլ Փաշինյանն ու իր մանկլավիկները առիթը բաց չէին թողնում հայտարարելու, թե Հայաստանում վերացնում են համակարգային կոռուպցիան, որ այլևս կաշառակերությունն արմատախիլ է արվում։ Նույնիսկ Եվրոպայի խորհուրդն է արձանագրում այդ խոսքերի սնանկությունը։ Գործող իշխանությունները գրեթե ոչինչ չեն արել Հայաստանում կոռուպցիայի դեմ պայքարի շրջանակներում, իսկ մամուլում պարբերաբար շրջանառվող տեղեկությունները վկայում են՝ ներկաները նույնիսկ այդ հարցում են գերազանցել իրենց բոլոր նախորդներին՝ միասին վերցրած։ Հովանավորչությունն ու կաշառակերությունը, տնտեսության յուղոտ ոլորտների յուրացումը, բանակից հափշտակությունները, միջազգային կասկածելի կորպորացիաների հետ փայեր մտնելը, կոռուպցիոն բոլոր տեսակի հանցագործությունները դարձել են Նիկոլ Փաշինյանի իշխանության այցեքարտը։ Հայաստանի քաղաքացիները «հեղափոխություն» անելով՝ ակնկալում էին նոր ու ավելի արդար երկրում ապրել, արժանիների իշխանություն ունենալ, փոխարենը ստացան հնից էլ անարդար, կոռուպցիայի մեջ թաթախված անարժանների, չտեսների և տգետների կառավարություն։

Էդգար Մարտիրոսյան