Իրանի սպառնալիքնեը Ադրբեջանին վտանգավոր են դառնում
ՎԵՐԼՈՒԾՈՒԹՅՈՒՆՆԵՐ
Ադրբեջանի ագրեսիվ վարքին Իրանի պաշտոնյաների և մամուլի արձագանքը կարելի է օրինակելի համարել։ Իրենց նկատմամբ թշնամական գործողություններին իրանական պաշտոնյաները այնպիսի պատասխան են տալիս Ադրբեջանին, որ բավարար կլիներ ինքնասիրություն ունեցող երկրին շատ ավելի կոշտ արձագանքելու, սակայն Ադրբեջանը ստիպված է լռել և լսել իր հասցեին հնչող արտահայտությունները։ Մասնավորապես Իրանի իսլամական հեղափոխության պահապանների կորպուսի հրամանատարի տեղակալ Ալի Սարդար Ֆադավին անդրադարձել է Ադրբեջանի նախագահ Իլհամ Ալիևին, և Ադրբեջանի ղեկավարության հռետորաբանությունը համեմատել է երեխայի վարքագծի հետ։
«Երբ փոքր երեխան վիրավորում և հայհոյում է ձեզ, դուք պարզապես շոյեք նրա գլուխը»,- ասել է ազդեցիկ զինվորականը։
Ֆադավին Ադրբեջանի ղեկավարի հայտարարություններն անվանել է ոչ ադեկվատ, անիմաստ և նշել, թե անհեթեթություններին պատասխանելու կարիք չկա։ Նույն այդ հեղափոխության պահապանների կորպուսի ղեկավարներից մեկը՝ գնդապետ Հոսեին ՓուրԷսմայիլը, նշել է, թե նորագույն պատմությունը ցույց է տալիս՝ ինչ ճակատագրի են արժանանում այն առաջնորդները, որոնք վստահում են Միացյալ Նահանգներին և իսրայելական կողմին։
Իսրայելի արտգործնախարարության խոսնակ Սաիդ Խաթիբզադեն էլ հայտարարել է, թե Թեհրանը չի հանդուրժում իր սահմանների մոտ իսրայելական ուժերին, իսկ իրանական զորավարժություններն անվանել ինքնիշխան գործը։ Գործը, որին որևէ մեկը չի կարող միջամտել։ Ոչ պակաս կոշտ է նաև իրանական մամուլի արձագանքը։ Այս ամենը վկայում է, որ Իրանը չափազանց ծանր է վերաբերվում տարածաշրջանային զարգացումներին և իր հասցեին իրանական ու թուրքական մամուլում պաշտոնյաների կողմից հնչող տեսակետներին։
Բնականաբար մեր տարածաշրջանում լուրջ վերադասավորումներ ու վտանգավոր զարգացումներ են ընթանում, և Իրանը որպես սեփական արժեք իմացող պետություն չի կարող անմասն մնալ։ Այս առումով Հայաստանի վիճակն էլ բավականին ուշագրավ է։ Իրանական կողմը քանիցս իր պատրաստակամությունն է հայտնել Հայաստանի հետ համագործակցելու առումով։ Որևէ հստակ արձագանք, սակայն հայկական կողմից այդպես էլ չի եղել։ Իհարկե Հայաստանի և Իրանի այսօրվա քաղաքական իշխանությունների միջև արժանապատվության, պետական ինստիտուտները գնահատելու և ավանդույթների հսկայական տարբերություն կա և ոչ ի օգուտ հայկական կողմի։
Տիգրան Գասպարյան
