Նիկոլ Փաշինյանը նոր հետապնդում է սկսում ընդդիմության դեմ

Ինչպես և կանխատեսվում էր Հայաստանի իշխանությունները պատրաստվում են նոր քրեական հետապնդում սկսել երկրորդ նախագահ Ռոբերտ Քոչարյանի դեմ։ Հայաստանի գլխավոր դատախազությունը հայտարարել է, թե ուսումնասիրում է 2008թ. հետընտրական իրադարձություններին առնչվող եվրոպական դատարանի հերթական վճիռն ընդդեմ Հայաստանի։ Երբ օրեր առաջ Ստրասբուրգում գտնվող դատարանը եզրակացություն տվեց, որ մարտի 1-ից հետո խախտվել են Նիկոլ Փաշինյանին պատկանող «Հայկական ժամանակ» օրաթերթի արտահայտվելու ազատության և արդար դատաքննության բոլոր իրավունքները, դեռևս այն ժամանակ հայցը ներկայացրած Տիգրան Աթանեսյանն ու այլ իրավաբաններ կարծիք հայտնեցին, թե այս վճիռը կարող է հիմք դառնալ Ռոբերտ Քոչարյանի հանդեպ նոր քրեական հետապնդում սկսելու համար։

Երկրորդ նախագահի փաստաբանները կարծում են, որ եվրոպական դատարանի վճիռը, ընդհակառակը, հաստատում է Ռոբերտ Քոչարյանի կողմից արտակարգ դրություն հաստատելու իրավասությունը։ Այդուհանդերձ երեկ գլխավոր դատախազության ներկայացուցիչ Գոռ Աբրահամյանը նշել է, թե ուսումնասիրում են այս վճիռը և առաջիկայում ավելի հանգամանալից կներկայացնեն իրենց դիտարկումները։ Իհարկե, ցանկացած պարագայում՝ ինչ էլ որ լինի, խնդիրը զուտ բացառապես քաղաքական ենթատեքստ ունի։ Նիկոլ Փաշինյանը չի կարող բաց թողնել ձեռքից հնարավորությունը Ռոբերտ Քոչարյանի դեմ նոր քրեական հետապնդում սկսելու, առավել ևս որ նույն մարտի 1-ի գործով սահմանադրական դատարանը արդարացրեց Ռոբերտ Քոչարյանին, իսկ գլխավոր դատախազությունը այժմ բողոքարկել է առաջին ատյանի դատարանի վճիռը արդարացման վերաբերյալ և պահանջում է նոր քրեական գործ հարուցել նույն հանցանքի առումով։

Ըստ էության, ակնհայտ է, որ առաջիկայում ականատեսն ենք լինելու նոր քրեական հետապնդումների թե՛ երկրորդ նախագահի, թե՛ նրա կողմնակիցների նկատմամբ։ Եվ այս ամենը լրջագույն խնդիրներ է հարուցելու  Հայաստանի Հանրապետության համար, որն այլևս միջազգային հանրության կողմից ընկալվելու է որպես քաղբանտարկյալներ և քաղաքական հալածյալներ ունեցող պետություն։

Ռաֆայել Թորոսյան