Տյումենում ավարտին է մոտենում առաջին հայկական եկեղեցու շինարարությունը
ՀԱՍԱՐԱԿՈՒԹՅՈՒՆ
72.ru-ն գրում է, որ Տյումենի Բերեզնյակովսկի (Բերեզնյակի) միկրոշրջանում ավարտվում է Սուրբ Մեսրոպ Մաշտոցի անվան Հայ առաքելական եկեղեցու շինարարությունը: Ըստ օբյեկտի անձնագրի բոլոր աշխատանքները պետք է ավարտվեին մինչև աշնան սկիզբը, սակայն մի շարք օբյեկտիվ պատճառներով շինարարությունը երկարաձգվել է 1–1,5 ամսով:
«Ժամկետներից փոքր ինչ ձգձգվում են: Փաստն այն է, որ մենք Տաճարի կառուցման համար տուֆի (հրաբխային քար) սալեր ենք բերում Հայաստանից: Եղել է ժամանակ, երբ այնտեղից բեռների փոխադրումը ժամանակավորապես դադարեցվել է: Շինարարության գործընթացը խոչընդոտել էր համաճարակը: Բացի այդ, ժամկետների վրա ազդել է այն, թե որքան արագ են պայմանագրեր կնքվում ռեսուրսներ մատակարարող կազմակերպությունների հետ իրենց ցանցերին միանալու համար: Տաճարը մոտավորապես պատրաստ կլինի հոկտեմբերին: Մենք փորձում ենք ամեն ինչ անել, որպեսզի շինարարությունն ավարտվի այս տարի», - 72.ru- ին ասել է շինարարական աշխատանքի ղեկավար Սուրեն Օհանյանը: Նրա խոսքով, հարակից տարածքի բարեկարգում ևս անպայման կիրականացվի, և միայն դրանից հետո եկեղեցին իր դռները կբացի ծխականների համար: Հետագայում տաճարի տարածքում կհայտնվի հանգստի գոտի` լիճ ունեցող այգի: Այդ աշխատանքները կարող են սկսվել այս աշնանը. ամեն ինչ կախված կլինի եղանակային պայմաններից և մի շարք այլ գործոններից:
Բերեզնյակիի եկեղեցու կառուցման կապալառուն «Տյումենտել» ԲԲԸ -ն է: Լրիվ ցիկլով շինարարական այս ընկերությունը ստեղծվել է 1997 թվականին: Ընկերության սեփականատերն ու գործադիր տնօրենը Աբրամ Օվեյանն է: Իր գոյության տարիների ընթացքում շինարարական ընկերությունը կառուցել է ավելի քան 200 օբյեկտ: Նրանց թվում են «Սիբիրի մարգարիտ» ձմեռային մարզաձևերի կենտրոնը, դպրոցը Վոստոչնի -2 միկրոշրջանում (այն կոչվում է տեղական Կոլիզեում), Տյումենի Ինդրուստրիալ ինստիտուտի ուսումնական մասնաշենքը և այլն: Նաև «Տյումենտել» -ը մասնակցել է «Նեֆտանիկ» հանգստյան կենտրոնի և Տյումենի պետական համալսարանի ֆիզիկական դաստիարակության մասնաշենքի վերակառուցմանը:
Նյութը հրապարակման պատրաստեց Կամո Խաչիկյանը
