«Քաղաքացիական պայմանագիրը» վերջապես կողմնորոշվեց իր թեկնածուների հարցում

Նիկոլ Փաշինյանի գլխավորած «Քաղաքացիական պայմանագիրը» վերջապես կողմնորոշվեց հոկտեմբերի 17-ին կայանալիք ՏԻՄ ընտրություններում իր թեկնածուների հարցում։ Կուսակցության վարչությունը երեկ նիստ է գումարել և որոշում կայացրել, որ «Քաղաքացիական պայմանագիր» կուսակցության ցուցակը Գյումրիում հոկտեմբերի 17-ին կայանալիք ընտրություններում կգլխավորի Շիրակի մարզպետ Հովհաննես Հարությունյանը: Դիլիջանում ցուցակը կգլխավորի համայնքի ղեկավարի պաշտոնակատար Դավիթ Սարգսյանը, Տեղ համայնքում՝ Դավիթ Ղուլունցը, Տաթևում՝ համայնքի ղեկավարի պաշտոնակատար Արթուր Մաթևոսյանը, Մեղրիում՝ համայնքի ղեկավարի պաշտոնակատար անդամ Արարատ Թումանյանը, Գորիսում՝ Վլադիմիր Աբունցը։

Կուսակցության մեր աղբյուրները նշում են, թե քննարկումները բավական բուռն են եղել։ ՔՊ-ում լուրջ խմորումներ են ընթացել, ազդեցություն ունեցող յուրաքանչյուր ոք փորձել է իր մտերիմին առաջ քաշել որպես քաղաքապետի թեկնածու։ Ի վերջո, ինչպես վայել է ժողովրդավարությունից զուրկ ցանկացած միավորի, վերջնական որոշումը կայացրել է բացառապես Նիկոլ Փաշինյանը։ Հատկապես բուռն են եղել Գյումրիի և Գորիսի թեկնածուների քննարկումները։

«Քաղաքացիական պայմանագիրը» գյումրեցի մի քանի պատգամավոր ունի, որոնք փորձել են իրենց մտերիմներին առաջադրել քաղաքապետի պաշտոնում։ Ընտրությունը կանգ է առել փոխզիջումային թեկնածուի վրա, իսկ Փաշինյանը նշել է, թե ճիշտը Հարությունյանի առաջադրումն է։ Նրան քաղաքապետի պաշտոնում անցկացնելուց հետո ում էլ նշաակեն մարզպետ, էական տարբերություն չի լինի։ Գորիսում, չնայած Սյունիքի մարզպետի և այլ պատգամավորների բողոքներին, թեկնածու է դարձել պատգամավոր Արմեն Խաչատրյանի նախընտրելի թեկնածուն։ Մեղրիում, Տեղում, Տաթևում և Դիլիջանում «Քաղաքացիական պայմանագիրը» այլընտրանք չի ունեցել։ Հիշեցնենք, Դիլիջանի քաղաքապետի թեկնածուն՝ Դավիթ Սարգսյանն այս տարվա փետրվարին էր ժամանակավոր պաշտոնակատար նշանակվել, մինչ այդ բենզալցակայանի աշխատակից էր։ Նա հայտնի դարձավ, երբ ԶԼՄ-ները տարածեցին իր անձնական թերթիկում արած նշումը։ Սարգսյանը սխալ էր գրել իր ավարտած ֆակուլտետի անունը, իսկ սեռի դիմաց գրել էր «արու»:

Միքայել Յարալյան