Քաղաքական ճգնաժամը չի հանգուցալուծվել և ավելի է խորանալու

Հունիսին կայացած խորհրդարանական արտահերթ ընտրություններն իբր պետք է հանգուցալուծեին քաղաքական խորագույն ճգնաժամը, որ ձևավորվել էր 44-օրյա պատերազմում կրած պարտությունից հետո։ Ձևավորված խորհրդարանը, այնտեղ ընթացող քննարկումների որակը, քաղաքական մտքի բացակայությունը ստիպում են արձանագրել՝ քաղաքական ճգնաժամը Հայաստանում չի հանգուցալուծվել և, գնալով, խորանում է։ Իսկ այդ խորացման հետևանքները կարող են անդառնալի լինել Հայաստանի Հանրապետության առաջ։ Սխալ կլինի մտածել, թե Նիկոլ Փաշինյանի գլխավորած իշխանությունը չի հասկանում այդ վտանգները, որոնք առաջին հերթին սպառնում են հենց իրենց իշխանությանը։ Այդ նպատակով էլ իշխանական քարոզչամեքենայի և սպասարկումների վրա դրվել է կարևորագույն մի առաքելություն՝ ամեն գնով ՀՀ քաղաքացիներին համոզել, թե երկրում ճգնաժամ չկա, իսկ ընդդիմությունը զբաղված է ապակառուցողական գործունեությամբ։ Օրերս էլ «Ազատ քաղաքացի» հասարակական կազմակերպության նախագահ Հովսեփ Խուրշուդյանն է հիշատակել դեռ հուլիսին ԱՄՆ Միջազգային հանրապետական ինստիտուտի անցկացրած հարցումները, թե հայաստանցիների 63 տոկոսը գոհ է հունիսի 20-ի խորհրդարանական ընտրությունների արդյունքներից, 29 տոկոսը` դժգոհ, իսկ 8 տոկոսն էլ դժվարանում է պատասխանել։

«Եթե բացարձակ մեծամասնությունը դրական է գնահատում ընտրությունների արդյունքները, դա նշանակում է, որ կա որոշակի բավարարվածություն հասարակության մեջ, իսկ նրանք, ովքեր բացասական են գնահատում, կարող են դժգոհ լինել, բայց դա չի նշանակում, որ քաղաքական ճգնաժամը շարունակվում է»,- ասել է նա:

Բնականաբար, կարող է տարօրինակ թվալ, որ սեպտեմբերին են հիշում երկու ամիս առաջ անցկացված ինչ-ինչ հարցումների մասին։ Իրականում, որևէ տարօրինակ բան չկա։ Նիկոլ Փաշինյանի իշխանությունը լուրջ վտանգներ է բերելու Հայաստանին։ Թե՛ արցախյան հարցում սպասվող զարգացումները, թե՛ հայ-թուրքական «դրական» ազդակները, թե՛ տնտեսության մեջ կանխատեսվող բարդացումները հանգեցնելու են Նիկոլ Փաշինյանի իշխանության նկատմամբ ժողովրդի լայն զանգվածների բողոքի ալիքի։ Եվ իշխանությունն այսօր խնդիր է դրել քարոզչական ճակատում լուրջ վերադասավորումներ իրականացնել, իրենց տրամադրության տակ գտնվող ԶԼՄ-ներով, Հանրային հեռուստատեսությամբ, սոցիալական ցանցերով լվանալ հանրության ուղեղը, անընդհատ ներարկել, թե երկրում ոչ մի ճգնաժամ ու խնդիր էլ չկա, ամեն ինչ հրաշալի է։ Ուստի առաջիկայում ավելի ու ավելի շատ կտեսնենք իշխանական քարոզիչների, որոնք փրփուրը բերաններին կավետեն, թե որքան հրաշալի է այս կյանքը և ով է այն տվել հայ ժողովրդին։

Դանիել Ներսիսյան