Փաշինյանը պնդում է, որ պետք է սկսել սահմանազատումը Ադրբեջանի հետ, իսկ օմբուսմեն Արմեն Թաթոյանը համոզված է, որ չի կարելի անել դա
ՀԱՍԱՐԱԿՈՒԹՅՈՒՆ
fondsk.ru-ն գրում է, որ Հայաստանի վարչապետ Նիկոլ Փաշինյանի խոսքով Երևանը պետք է շտապ սկսի սահմանազատել և սահմանագծել Ադրբեջանի և Վրաստանի հետ սահմանները: Նրա խոսքով սահմանազատումը կնպաստի տարածաշրջանում կայունության հաստատմանը: Վրաստանի հետ սահմանազատումը սկսվել է դեռ 1997 թվականին, սակայն դեռ ավարտված չէ: «Վստահ եմ, որ մենք կշարունակենք այս գործընթացը փոխըմբռնման մթնոլորտում և կհասցնենք այն իր տրամաբանական ավարտին»,- վստահություն է հայտնել Փաշինյանը: Նրա խոսքով, այդ գործընթացը բարդ է, քանի որ սահմանի որոշ հատվածներ անցնում են հեռավոր լեռնային շրջաններով, սակայն սահմանազատման ձգձգվող գործընթացը չի ազդում Թբիլիսիի հետ բարիդրացիական հարաբերությունների վրա: «Փաստորեն, մենք պետք է իրականացնենք սահմանազատման և սահմանագծման գործընթաց միայն մեր հետխորհրդային հարևանների հետ, քանի որ Թուրքիայի և Իրանի դեպքում հարցը լուծվել է խորհրդային ժամանակաշրջանում», - պարզաբանել է վարչապետը:
Այնուամենայնիվ, Ադրբեջանի դեպքում սահմանազատման գործընթացը կարող է լինել բարդ և անկանխատեսելի, հատկապես սահմանի որոշ հարավային հատվածներում, սակայն վարչապետը վստահ է, որ պետք է շտապել: «Կարծում եմ, որ մենք պետք է հնարավորինս շուտ սկսենք Ադրբեջանի հետ սահմանազատման և սահմանագծման գործընթացը: Ես շատ ցավում եմ, որ այդ հարցի վերաբերյալ ուրվագծված որոշումներին չհաջողվեց հասնել գարնանը Հայաստանում ներքաղաքական բուռն աղմուկի պատճառով: Միևնույն ժամանակ, հայ-ադրբեջանական սահմանի որոշ հատվածներում առաջացած ճգնաժամային իրավիճակը լուրջ խոչընդոտ է այդ աշխատանքների մեկնարկի համար, քանի որ սահմանազատումը կայունություն է պահանջում սահմանի ողջ երկայնքով», - նշել է Նիկոլ Փաշինյանը դժվարին դեպքերում առաջարկելով հիմք ընդունել խորհրդային շրջանի համակարգված քարտեզները:
Երևանը սահմանին կայունության ապահովման երեք տարբերակ է առաջարկում. Հայ-ադրբեջանական սահմանի ողջ երկայնքով ռուս խաղաղապահների տեղակայումը, ՀԱՊԿ դիտորդների տեղակայումը կամ ԵԱՀԿ Մինսկի խմբի համանախագահ երկրներից դիտորդների տեղակայումը: Այս բոլոր տարբերակներն էլ ներկայումս քննարկվում են: Բաքվում հիշեցրել են, որ Եվրամիությունը պատրաստ է աջակցություն ցուցաբերել հայ-ադրբեջանական սահմանի սահմանազատման և սահմանագծման գործում, որի մասին հայտնել է Ադրբեջանում ԵՄ պատվիրակությունը:
Հայաստանի մարդու իրավունքների պաշտպան Արման Թաթոյանը դեմ է սահմանազատման գործընթացի մեկնարկին: Նա կարծում է, որ նախ անհրաժեշտ է ադրբեջանցի զինվորականներին դուրս բերել Հայաստանի տարածքից, որտեղ նրանք գտնվում են մայիսի 12 -ից, գրավված դաշտերն ու արոտավայրերը վերադարձնել Սյունիքի և Գեղարքունիքի բնակիչներին, հակառակ դեպքում սահմանազատումը կօրինականացնի հայկական տարածքների կորուստը: «Ներկայիս պայմաններում սահմանազատում և սահմանագծում չի կարող իրականացվել: Սա կարող է հանգեցնել իրավիճակի էլ ավելի սրման սահմանամերձ գոտու բնակիչների իրավունքների խախտման առումով: Նրանց իրավունքները պետք է վերականգնվեն: Այդ գործընթացները պետք է իրականացվեն Հայաստանի տարածքից ադրբեջանցի զինծառայողների դուրսբերմանը զուգահեռ»,- պնդում է ՄԻՊ -ը:
Նյութը հրապարակման պատրաստեց Կամո Խաչիկյանը
