Ազգային ժողովում շարունակում են խախտել լրագրողների և պատգամավորների իրավունքները
ՎԵՐԼՈՒԾՈՒԹՅՈՒՆՆԵՐ
Ազգային ժողովում տարօրինակ միտում է նկատվում․ դահլիճում սրացումների ժամանակ անվտանգության աշխատակիցներն առաջինը նետվում են լրագրողների օթյակ և դուրս վռնդում բոլոր լրագրողներին՝ թույլ չտալով տեսագրել դահլիճի իրարանցումը։ Նորանկախ Հայաստանի պատմության ընթացքում սա լրագրողների իրավունքների նման զանգվածային խախտման առաջին դեպքն է։
Փաստացի, ԱԺ նախագահ Ալեն Սիմոնյանը և իր կուսակիցները փորձում են հանրությանը զրկել իրենց պահվածքը լուսաբանելու հնարավորությունից։ Իհարկե, այս որոշումնառավել քան անհեթեթ է, լրագրողների փոխարեն դահլիճում կատարվող իրադարձություները, ծեծուջարդը, ընդհարումները բավական հաջող լուսաբանում են ընդդիմադիր պատգամավորները, որոնք ուղիղ եթերում ցույց են տալիս, թե ինչ է կատարվում, ով ում վրա հարձակվեց, ով ում հարվածեց։ Ակնհայտ է՝ լրագրողներին և օպերատորներին վռնդելով օթյակից՝ իշխանությունը չկարողացավ հասնել իր բուն նպատակին, և այժմ որոշել է հերթական անհեթեթությունն անել՝ արգելել պատգամավորների՝ իրենց հեռախոսները մտցնել նիստերի դահլիճ։
«Հրապարակ» թերթի տեղեկություններով, «Քաղաքացիական պայմանագիրը» քննարկում է արել և որոշել, որ կդիմի ԱԺ նախագահությանը՝ այս առումով նոր որոշում ընդունելու առաջարկով, որով կզրկեն հանրությանը իրականությունը տեսնելու վերջին հնարավորությունից։ Իհարկե, պատգամավորների իրավունքների նման խախտումը լուրջ աղմուկ է բարձրացնելու, Ալեն Սիմոնյանին դժվար թե հաջողվի անցկացնել այս որոշումը։ Դրան, թերևս, դեմ լինեն նաև իշխանական պատգամավորները, որոնց զգալի մասը ԱԺ նիստերի դահլիճում զբաղված է բացառապես հեռախոսով խաղեր խաղալով։ Եվ հեռախոսները ներս մտցնելու արգելքը առաջին հերթին չի բխում հենց այդ պատգամավորների շահերից։
Կարեն Ադամյան
