Ազգային ժողովում թեժ է լինելու

Հայաստանի Ազգային ժողովում այսօր և առաջիկա օրերին թեժ է լինելու։ Խորհրդարանը քննարկում է Հայաստանի՝ 2021-2026 թվականների կառավարության ծրագիրը, որը ներկայացնելու համար Ազգային ժողով է ներկայացել վարչապետ Նիկոլ Փաշինյանը։ Վերջինս հրաշալի գիտակցում է, որ իրեն բարդ ժամեր են սպասվում, ընդդիմությունն առիթն օգտագործելու է հենց նրա երեսին ասելու իր մտածածը, նաև տհաճ հարցեր ուղղելու վարչապետի պաշտոնը զբաղեցնող անձին։ Հենց այդ հանգամանքն էր պատճառը, որ երեկ վերաքննիչ քրեական դատարանը հապշտապ նիստ գումարեց և որոշեց կալանավորել «Հայաստան» դաշինքի պատգամավոր Արմեն Չարչյանին։ Այդ ապօրինությամբ Փաշինյանը նախ փորձում է ահաբեկել ընդդիմադիր պատգամավորներին, նաև ծրագրի քննարկումները տանել բոլորովին այլ հունով։

Կառավարությունը 91 էջանոց հսկա փասաթղթում ընդամենը կես էջ գեղեցիկ կենացներ է գրել «Լեռնային Ղարաբաղի» ժողովրդի մասին, իսկ «Արցախի Հանրապետություն» եզրույթն ընդհանրապես բացակայում է ծրագրից։ Զինված ուժերին վերաբերող բաժինն էլ կազմում է երեք էջ։ Չարչյանին կալանավորելով՝ Փաշինյանը հույս ունի, որ ընդդիմությունն իր հարցերի և ելույթների հիմնական շեշտը կդնի այդ փաստի վրա, իսկ կառավարության ծրագրի թերություններին ու հանցավոր բացթողումներին չի անդրադառնա։ Ըստ ամենայնի, Նիկոլ Փաշինյանի այդ մտահղացումն էլ իրականություն չի դառնա։ Ազգային ժողովի «Պատիվ ունեմ» խմբակցությունն էլ, ի նշան բողոքի, լքել է նիստերի դահլիճը։ Խմբակցության ղեկավար Արթուր Վանեցյանը հայտարարել է, թե նիստերի դահլիճ կվերադառնան կառավարության ծրագրում ներկայացված կեղծիքները բացահայտելու և բարձաձայնելու համար։

Սարգիս Իսպիրյան