Նիկոլ Փաշինյանը չի վստահում ոչ յուրայիններին

Նիկոլ Փաշինյանը չի վստահում ոչ յուրայիններին և առանց խղճի խայթի առաջին իսկ անհրաժեշտության դեպքում ազատվում է նրանցից՝ անկախ նրանից, թե ինչ պաշտոն են զբաղեցնում։ Կադրային լուծումները, որ վերջին շրջանում իրականացվում են՝ նախարարների, ՊԵԿ նախագահի փոփոխությունները, վկայում են, որ Փաշինյանն առանց խղճի խայթի ազատվում է յուրաքանչյուրից, ով իր թիմի անդամ չէ։ Թեպետ այդ անձինք փորձել են ինտեգրվել փաշինյանական թիմին, անգամ քաղաքական աջակցություն են հայտնել, քննադատել են արմատական ընդդիմությանը, ավելի կաթոլիկ են եղել, քան Հռոմի պապը։ Թե՛ Բարձր տեխնոլոգիական արդյունաբերության նախկին նախարար Հայկ Չոբանյանը, թե՛ ՊԵԿ նախագահ Էդուարդ Հովհաննիսյանը անմռունչ կատարել են Փաշինյանի բոլոր հրահանգները, բայց կառավարության ձևավորման ժամանակ Փաշինյանն առաջինն իրենց է զոհել, քանի որ թիմակից չեն և մինչև վերջ վստահելի չեն։

Մեր տեղեկություններով, այժմ էլ հարվածի տակ է Հեռուստատեսության և ռադիոյի ազգային հանձնաժողովի նախագահ Տիգրան Հակոբյանը։ Փաշինյանը ցանկանում է նրան փոխել, որովհետև լուրջ վստահություն չունի։ Հակոբյանին չհաջողվեց զտումներ իրականացնել հանձնաժողովում, իսկ հեռուստատեսային ալիքների բաշխման գործընթացն էլ իշխանության սրտով չեղավ։ Միևնույն ժամանակ Տիգրան Հակոբյանը, փաշինյանականների կարծիքով, Սերժ Սարգսյանի մարդն է համարվում, աշխատել է նախկին նախագահի օրոք։ Ավելին, Սերժ Սարգսյանն է նրան հանել բանտից, և ՀՌԱՀ նախագահը պարտական է նրան։ ՀՌԱՀ նախագահի թեկնածության համար իշխանությունն այսօր փնտրուքների մեջ է։ Հանրային հեռուստառադիոընկերության խորհրդի անդամ տակավին վերջերս նշանակված Վահագն Թևոսյանի անձն է քննարկվում։ Թևոսյանը Փաշինյանի մտերիմներից է, եղել է «Հայկական ժամանակի» աշխատակից։ Իշխանափոխությունից հետո զբաղեցրել Հանրայինի լրատվական ծառայության ղեկավարի պաշտոնը, եղել ԱԺ պատգամավոր, ապա նշանակվել է ՀՀՌԸԽ անդամ։ Այլ թեկնածուներ ևս քննարկվում են, ուստի առաջիկայում ՀՌԱՀ-ում լուրջ փոփոխություններ են սպասվում։

Նարեկ Երանոսյան