Մենք արդեն ունենք շատ լավ ձևավորված իմունային շերտ
ՀԱՍԱՐԱԿՈՒԹՅՈՒՆ
Հայաստանում արձանագրվել են կորոնավիրրուսի «դելտա» շտամով վարակվածության դեպքեր։ Մասնագետներն ասում են, որ այն ավելի արագ է տարածվում։
Այս թեմայով զրուցել ենք վարակաբան Արմեն Օհանյանի հետ։
Հարցին, թե արդյոք նոր բռնկում կարող է լինել, մասնագետը պատասխանել է․ «Նախ ասեմ, որ ինչ վերաբերում է արագ տարածվելուն, Հայաստանի դեպքում սխալ է այդպես գնահատել, որովհետև մենք չունենք արագ տարածում։ Հենց պաշտոնական թվերից ակնհայտ երևում է դա, չհաշված այն, որ հիվանդանոցներում Covid-ով հիվանդների համար մահճակալային ֆոնդի ավելացում ինտենսիվ չի իրականացվում։ Այսինքն՝ արագ տեմպերով հիվանդանոցային բաժանմունքների բացում տեղի չի ունենում, իսկ դա կլիներ, եթե «դելտա» շտամը մեզ մոտ ունենար այն բարձր տարածվածությունը, ինչի մասին խոսվում է։ Դա գալիս է նրանից, որ մենք արդեն ունենք շատ լավ ձևավորված իմուն շերտ։ Այն անձինք, ովքեր արդեն հիվանդացել են, իրենց շրջանում վարակվածությունը շատ ցածր է։ Հիմնականում վարակվածները Ռուսաստանից կամ այլ երկրներից եկածներն են կամ իրենց հետ շփված անձինք։ Այսինքն՝ որպես այդպիսին մենք վարակի ներքին տարածում դեռ չունենք։ Իսկ այդ շփված անձինք էլ մեծամասամբ նրանք են, ովքեր մինչ օրս չեն հիվանդացել։ Այսինքն, կոպիտ ասած, «պոչի» մասն է մնացել։ Հիմնականում նրանք են վարակվում, ովքեր չեն վարակվել։ Եվ, այո, որոշակի քանակով կան կրկնավարակներ, որոնք մեծ դեր չունեն»։
Անդրադառնալով այն հարցին, թե ինչո՞ւ են մարդիկ խուսափում պատվաստվելուց, վարակաբանը ասել է․ «Որովհետև կառավարությունը, նախարարությունն անկեղծ չեն, վարակի հենց առաջին օրերից որոշել են հրամայական խոսել ժողովրդի հետ և իրենց դառը փորձից չեն կարողանում դասեր քաղել, որ մարդիկ հրամանները չեն կատարելու։ Մարդկանց հետ պետք է անկեղծ լինել, բացատրել, գիտակից մոտենալ։ Բազմաթիվ անգամ անդրադարձ եմ կատարել այդ թեմային։ Չի կարելի ստիպողաբար բոլորին անխտիր պատվաստել ու ընդամենը փորձել թվեր նկարել ու ցույց տալ։ Նախ մենք այն հարուստ երկիրը չենք, որ կարողանանք 3 մլն դեղաչափ պատվաստանյութ ձեռք բերել, որպեսզի ամբողջ բնակչությանը պատվաստենք։ Դա շատ երկար ժամանակ է տևելու և մեծ ֆինանսական ծախսեր է ենթադրում։ Դրա համար շատ կարևոր է որոշել թիրախային ու ռիսկի խմբերը, չհիվանդացած անձանց, գրագետ բացատրել՝ ում երբ է պետք պատվաստվել։ Այդ դեպքում, ես վստահ եմ, որ պատվաստվելուց հրաժարվողների ճնշող մեծամասնությունը հերթ կկանգնեին ու մեծ հաճույքով կգային պատվաստվելու»։
Սոնա Գիշյան
