Կանոնավոր զորքը հերոսաբար դիմադրում էր, ես պիտի խոսեի պարտության մասի՞ն․ Արծրուն Հովհաննիսյան
ՔԱՂԱՔԱԿԱՆՈՒԹՅՈՒՆ
Արծրուն Հովհաննիսյանն ինչպես խոստացել էր հաղորդումների շարք է ներկայացնելու, որտեղ անդրադառնալու է 44 օրյա պատերազմին և ոչ միայն։ Համացանցում արդեն հայտնվել է հաղորդաշարի առաջին մասը, որտեղ Արծրուն Հովհաննիսյանը կոնկրետ փաստերով ներկայացնում է կոնկրետ իրավիճակներ։
Նախ սկզբում Հովհաննիսյանն արդրադարձավ պատերազմի ժամանակագրությանը, այնուհետև խոսեց պատերազմից հետո իր հասցեին հնչող վիրավորանքների, սպառնալիքների մասին փաստերով։ Արծրուն Հովհաննիսյանը ասել է․ «Կանոնավոր զորքը հերոսաբար դիմադրում էր, ես պիտի խոսեի պարտության մասի՞ն»։
«Աշխարհում ոչ մի պետություն պատերազմի ընթացքում չի կարող ասել, որ ինքը չի հաղթելու․ անբնական բան կստացվի։ Եթե դու ունես հերոսաբար կռվող զորք և էդ զորքին ասում ես՝ գիտե՞ս ինչ, քանի որ դու ութ անգամ քեզ գերազանցող հակառակորդ ունես, դու շանս չունես հաղթելու․․․ էդպիսի բան չի կարելի ասել զորքին»,- այս մասին 44-օրյա պատերազմից մանրամասներ ներկայացնելիս ասել է ՀՀ ՊՆ մամուլի նախկին խոսնակ, պահեստազորի գնդապետ Արծրուն Հովհաննիսյանը։
«Այո՛, պատերազմի ընթացքում անիմաստ օպտիմիզմ չի կարելի տալ։ Հաճախ էս հարցում ինձ մեղադրում են։ Բայց եկեք ազնվորեն նայենք 44-օրյա իմ ներկայացրած բրիֆինգների ժամանակագրությունը և կտեսնեք, որ պատերազմի մոտավորապես 20-րդ օրը չկար որևէ ոգևորված օպտիմիզմ․․․ Անդադար զգուշացումներ էին, որ ծանր մարտեր են, վիճակն էնքան էլ լավ չի, բայց պետք չէ ընկճվել»,- նշել է Հովհաննիսյանը։
«Իսկ ի՞նչ է, պետք է ասեի՝ կոտրվե՞ք։ Ինչպե՞ս եք պատկերացնում՝ կանոնավոր զորքը հերոսաբար դիմադրում էր, երկու-երեք պաշտպանական շրջաններում ունեինք գլոբալ պրոբլեմ, մնացած պաշտպանական շրջանները, ամբողջ 2-րդ բանակային կորպուսը հերոսաբար դիմադրում է, ոչ մի քայլ չի նահանջել, ես պիտի խոսեի պարտության մասի՞ն, որտեղ է տրամաբանությունը»,- ասել է նա։
ՊՆ նախկին խոսնակն անդրադարձել է, թե որ դեպքից հետո է նրա հանդեպ սկսվել նման տեռոր: Ըստ Արծրուն Հովհաննիսյանի` դեպքը տեղի է ունեցել 2014 թվականին, երբ ինչ-ինչ քաղաքական հաշվարկներով իր ղեկավարի նկատմամբ սկսվել էր մեդիատեռոր, կային դրված կոնկրետ հարցեր, որոնց հետ ես համաձայն չէի, պայքարում և դիմադրում էի և այդ ամենից սկսվեց իր հանդեպ ատելությունը։
Սոնա Գիշյան
