Անորակ կրկես. ԱԺ փոխնախագահ ընտրեցին միայն երրորդ փորձից

Հայաստանի Ազգային ժողովը մեկ շաբաթ տևած նիստերում կարողացավ ընտրել միայն ԱԺ նախագահ և փոխնախագահներ։ Ամենաբուռն և անհեթեթ իրավիճակը ստեղծվեց ԱԺ ընդդիմադիր փոխնախագահի ընտրության ընթացքում․ միայն երրորդ փորձից հաջողվեց «Հայաստան» դաշինքի կողմից առաջադրված Իշխան Սաղաթելյանին ընտրել փոխնախագահի պաշտոնում։ Երեկ առաջին քվեարկության 104 պատգամավոր էր մասնակցել ընտրությանը, 53-ը կողմ էին եղել, 50-ը դեմ, ևս մեկ՝ այս դեպքում որոշիչ քվեաթերթիկ ճանաչվել էր անվավեր։ «Քաղաքացիական պայմանագիրը» հայտարարում էր, թե լրացրել է անհրաժեշտ 21 քվեն, սակայն հենց «Հայաստան» դաշինքի մի պատգամավորը՝ Դավիթ Սեդրակյանը չի ներկայացել նիստին, այլ նախընտրել է մեկնել հանգստանալու։ Երկրորդ քվեարկության ժամանակ մասնակցել էր 103 պատգամավոր, Սաղաթելյանին կողմ էին քվեարկել 49-ը դեմ՝ նույնպես 49 պագամավոր, ընտրության համար անհրաժեշտ 5 քվեաթերթիկները անվավեր էին։

 

Ազգային ժողովի նորընտիր նախագահ Ալեն Սիմոնյանը «միամիտ» բացահայտեց իրենց ցանկությունը, ասաց՝ ճգնաժամ է խորհրդարանում, անգամ առաջարկեց հարցն առկախել, անցնել օրակարգի մյուս հարցերին և որոշ ժամանակ հետո կրկին փորձել փոխխոսնակ ընտրել, սակայն ընդդիմությունը անդրդվելի էր, պահանջում էր նախ ընտրել փոխնախագահին, ապա անցնել օրակարգի մյուս կետերին։ Փաստացի, բացահայտվեց նաև իշխող ուժի ևս մեկ դավադրություն։

 

Նրանք երկու նպատակ էին հետապնդում, բուռն քննարկումներով մեղադրանքներ հղել ընդդիմադիր խմբակցություններին, ընտրության տապալմամբ կասկածներ սերմանել «Հայաստան» և «Պատիվ ունեմ» դաշինքների միջև։ Կամ էլ Սաղաթելյանի փոխարեն մեկ այլ՝ իրենց համար նախընտրելի թեկնածուի ընտրել։ Ընդդիմությունը կարողացավ կանխել այդ զարգացումը, ի վերջո այսօր առավոտյան կայացավ երրորդ քվեարկությունը։ 107 պատգամավորներից ընտրությանը մասնակցել էին 103 պատգամավորներ։ Անվավեր էին երկու քվեաթերթիկներ։ Իշխան Սաղաթելյանը ստացել էր 64 կողմ քվե, 37 պատգամավորներ էլ դեմ էին քվեարկել։ Ըստ էության, Հայաստանի առջև ծառացած մարտահրավերները թողած Ազգային ժողովը բառացիորեն «տունտունիկ» է խաղում, իսկ մինչ այդ երկիրը շարունակում է մնալ անդունդում։