Իշխանությունը չի ընդունի Սեյրան Օհանյանի ողջամիտ առաջարկը

Ազգային ժողովում «Հայաստան» դաշինք խմբակցության ղեկավար Սեյրան Օհանյանը երեկ հայտարարել է, թե արցախյան 44-օրյա պատերազմի հանգամանքները ուսումնասիրող քննիչ հանձնաժողովը պետք է լինի ընդդիմության գլխավորությամբ։ Արձանագրելով, որ քննիչ հանձնաժողով ստեղծելու գաղափարն ընդդիմությունը միշտ արտահայտել է, թե՛ «Հայրենիքի փրկության շարժման» ժամանակ, թե՛ այդ գաղափարը եղել է «Հայաստան» դաշինքի ծրագրերում՝ Սեյրան Օհանյանը ասել է․

«Կարծում եմ, որ բավականին մեծ քանակությամբ խնդիրներ, հարցեր կան՝ վերաբերող պետական կառավարման համակարգին, գլխավոր հրամանատարի, ռազմակայանի գործունեությանը և այլն: Այդ հանձնաժողովը կարող է լիարժեք գործել և ամբողջությամբ բացահայտել և´ դրական, և´ բացասական կողմերը, եթե այդ հանձնաժողովը տրվի ընդդիմությանը, հակառակ դեպքում ես չեմ կարծում, թե ամբողջությամբ կգան այն մարդիկ, որոնք պետք է հարցաքննվեն և պատասխանեն բոլոր հարցերին»։

Եթե քննիչ հանձնաժողովի ղեկավարումը չհանձնեն ընդդիմությանը, ապա իրենք փաստահավաք խումբ ստեղծելու նախաձեռնություն կանեն, որտեղ համաչափ մասնակցությունը կապահովի լիարժեք քննություն: Պատերազմում խայտառակ պարտությունից անցել է արդեն գրեթե 9 ամիս, և հանրությունն առ այսօր որևէ մանրամասնի չի տիրապետում, թե ինչը հանգեցրեց պարտության, ով ինչ դերակատարում է ունեցել պարտության գործում։ Իսկ իշխանությունն ամեն բան անում է՝ պատասխանները հանրությունից թաքցնելու համար։ Այդ առումով Սեյրան Օհանյանի պահանջը ողջամիտ է։ Ընդդիմությունը շահագրգիռ է բացահայտելու պարտության հանգամանքները, իսկ իշխանությունը, եթե վախենալու բան չունի, տրամաբանորեն պետք է որ ընդուներ քննիչ հանձնաժողովը ընդդիմությանը հանձնելու առաջարկը։ Մինչդեռ հենց Նիկոլ Փաշինյանի գլխավորած քաղաքական ուժն է ամեն ինչ անում պատերազմի հանգամանքները թաքցնելու համար, այդ հանձնաժողովն էլ ստեղծում են՝ իրական մեղավորներին կոծկելու, մեղքն այլոց վրա բարդելու համար։ ԱԺ Պաշտպանության և անվտանգության հարցերի հանձնաժողովը՝ Անդրանիկ Քոչարյանի գլխավորությամբ, դեռ նույնիսկ ապրիլյան պատերազմի մասին զեկույցը չի հրապարակել, ուր մնաց, թե լույս սփռի 44-օրյա պատերազմի վրա։

Հայկ Լևոնյան