Բարոյազրկում՝ «level Շիշ բռնող»
ՎԵՐԼՈՒԾՈՒԹՅՈՒՆՆԵՐ
Գեղարքունիքում երեկ ծավալված մարտերը մտահոգել էին ողջ ժողովրդին, բայց ոչ, թերևս, Փաշինյանի կողմնակիցներին, որոնցից մի քանիսն առիթը բաց չթողեցին ի ցույց դնելու իրենց բարոյազրկման ողջ ներկապնակը։ Մինչ հանրությունն ահուսարսափի մեջ սպասում էր մեր ԶՈՒ-երի մասին լուրերի, մղկտում՝ երեք զոհերի անունները կարդալիս, Նիկոլ Փաշինյանի մերձավորը անվրդով իր բիզնեսն էր շարունակում։ Նրան մտահոգել էր այն հանգամանքը, որ գնդակոծվող բնակավայրերի շարքում նշված էր նաև Վերին Շորժան։
«Սպիտակ Շորժա» անունը կրող, փաստաթղթերով ԱԺ պատգամավոր Հայկ Սարգսյանի ընկերոջը, իսկ իրականում հենց իրեն՝ պատգամավորին պատկանող լողափը սոցիալական ցանցերում ծաղրական մի գրառում էր արել․ «Սպիտակ Շորժայից Վերին Շորժա հեռավորությունը 88 կմ է, մենք շարունակում ենք սպասարկել մեր հյուրերին»։
Միգուցե, ԱԺ տխրահռչակ պատգամավորը մտահոգվել էր, թե մարդիկ կարող են, Շորժա անունը լսելով, չգալ իր լողափ և կզրկվի այդ մեկ օրվա եկամուտից։ Անցած տարի այդ լողափն աշխատեց մի քանի օր, թղթաբանության խնդիրների պատճառով փակվեց։ Այս տարի պատգամավորը, կարծես, լուծել է բոլոր խնդիրները, բավական լուրջ ներդրում արել, հո չէր կարո՞ղ ինչ-որ «սահմանային միջադեպի» պատճառով կորցնել դրած փողը։
Գրառումից հետո քննադատությունների բուռն ալիք բարձրացավ, օգտատերերը «Սպիտակ Շորժայի» էջում պահանջում էին հեռացնել այդ գրառումը, քննադատում և հայհոյում էին։ Նիկոլ Փաշինյանի իշխանության կարկառուն ներկայացուցիչ Շիշ բռնողի ընկերությունը ոչ միայն չէր ամաչում իր պահվածքից, այլ քննադատողներին էր հայհոյում, «անշնորհակալ ղարաբաղցի» անվանում։
Ընդհանրապես, Նիկոլ Փաշինյանի իշխանության ամենաանկեղծ ներկայացուցիչը հենց Հայկ Սարգսյանն է։ Ի տարբերություն ճոռոմ և վսեմ արտահայտություններ անող, հայրենասիրության մասին ներբողներ ձոնող մյուս կուսակիցների, նա չի էլ թաքցնում, որ իշխանության է եկել անձնական հարստացման համար, և որևէ օր չի ցանկանում բաց թողնել այդ հնարավորությունը։
Ինչո՞ւ չանի, Փաշինյանի պես թիկունք ունի, իրենց սրտի հանրությունն էլ 54 տոկոս քվե է տվել։
Արտակ Գալյան
