Արարատ Միրզոյանին մի կերպ տեղավորեցին նոր պաշտոնի
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանի իշխանությունը վերջապես գտավ մի պաշտոն, որին կարող է նշանակել Ազգային ժողովի արդեն նախկին նախագահ Արարատ Միրզոյանին։ Մամուլում երեկ տեղեկություն հայտնվեց, թե Միրզոյանը համաձայնել է նշանակվել Անվտանգության խորհրդի քարտուղարի պաշտոնին, թեև մինչ այդ համառորեն հրաժարվում էր բոլոր առաջարկներից, այդ թվում՝ ԱԳ նախարար կամ ՌԴ-ում դեսպան նշանակվելու հեռանկարներից։
Օրեր առաջ էլ Արարատ Միրզոյանը ԿԸՀ էր ներկայացրել պատգամավորական մանդատից հրաժարվելու դիմումը, ինչից հետո տեղեկություններ տարածվեցին, թե նա կարող է ԱԳ նախարար նշանակվել։
Ազգային անվտանգության ծառայության բացահայտված գործակալը, նշենք, խորապես նեղացած էր իր քաղաքական թիմից, որ, չնայած իր ջանքերին և ընտրացուցակում երկրորդը լինելու հանգամանքին, չէին ցանկանում վերընտրել ԱԺ նախագահի պաշտոնում, իսկ դրանից պակաս պաշտոն նրա սիրտը չէր էլ ցանկանում։ Թերևս գտել են մի ոլորտ, որտեղ Արարատ Միրզոյանը կարող է ինքնադրսևորվել, հատկապես Անվտանգության խորհրդում իր աշխատանքը ձախողած Արմեն Գրիգորյանից հետո։ Վերջինս ազատվել էր ԱԽ քարտուղարի պաշտոնից և նշանակվել առաջին փոխարտգործնախարար։
«Քաղաքացիական պայմանագրի» թիմը ևս նեղացած է Միրզոյանից, ով ամիսներ շարունակ չէր մասնակցում քաղաքական պրոցեսներին, չէր աջակցում թիմակիցներին, և ակտիվացել էր միայն նախընտական քարոզարշավի օրերին՝ մարզային մի քանի հանդիպումներում ելույթներ ունենալով։ Փոխարենը, Ալեն Սիմոնյանը կոկորդ էր պատռում հանուն Նիկոլ Փաշինյանի։ Հետևաբար, Փաշինյանը երկու կուսակիցներից որպես ԱԺ նոր նախագահ ընտրել է իրեն առավել նվիրվածին։ Խորհրդարանում իր դիրքերը լրջորեն զիջել է նաև Արարատ Միրզոյանի, պայմանական ասած, թիմը։ Նրա ընկերներից մի քանիսն ընդհանրապես չէին ներգրավվել ընտրական ցուցակում, մյուսներն էլ մի կերպ անցել են խորհրդարան, և մինչ օրս հայտնի չէ՝ կնշանակվե՞ն հանձնաժողովի նախագահների պաշտոնում Նարեկ Զեյնալյանն ու Վլադիմիր Վարդանյանը, թե՞ ոչ։
Կարեն Գևորգյան
