Փորձագետ. Եվրոմիությունը Հայաստանի հարավային շրջանների զարգացումը շեշտելով ուղերձ է հղում Կրեմլին և Բաքվին
ՎԵՐԼՈՒԾՈՒԹՅՈՒՆՆԵՐ
fraza.com-ը գրում է, որ Եվրահանձնաժողովը` առաջարկելով Հայաստանին տրամադրել 1,5 միլիարդ եվրո աջակցություն, Արևելյան գործընկերության ձևաչափի շրջանակներում, լուրջ հայտ է ներկայացրել տարածաշրջանում իր դիրքերն ամրապնդելու համար: Ինչպես ընդգծել է ուկրաինացի քաղաքական վերլուծաբան Մարատ Հակոբյանը Հայաստանին ֆինանսավորելու Բրյուսելի որոշումը, խոսքը բուն գումարի մասին չէ:
«ԵՄ-ն շեշտը դնելով Հայաստանի հարավային շրջանների զարգացման վրա ուղերձ է հղում Կրեմլին և Բաքվին Բրյուսելի նպատակների մասին, և հատկապես ակնհայտ է Հյուսիս-հարավ մայրուղու նախագծին աջակցելու ցանկությամբ, ինչը, ըստ էության, Պարսից ծոցի հատված (+ Հնդկաստան) - Սև ծով (Եվրոպա) միջանցքն է», - բացատրել է նա ավելացնելով, որ «դա իրականում ցույց է տալիս Մոսկվայի, Բաքվի և Անկարայի կողմից ցուցադրված քաղաքական հավակնությունների ապարդյունությունն ու Հայաստանի ինքնիշխանության հաշվին միջանցքների պահանջների մեռելածնությունը»:
«Եվրոպան մատնանշում է Վրաստանի և Հայաստանի միջով տնտեսական կայուն և քաղաքական հեռանկարային բնական միջանցքը, որը կկապի Արևելյան Եվրոպան Ասիայի հետ», - եզրափակել է Հակոբյանը շեշտելով, որ Եվրահանձնաժողովի առաջարկը պարունակում է նաև մեսիջներ Հայաստանի իշխանությունների համար:
Հիշեցնենք, որ ավելի վաղ հայտնի էր դարձել, որ Եվրամիությունը առաջիկա 5 տարում Հայաստանին կհատկացնի ավելի քան 1.5 միլիարդ եվրո հինգ հիմնական ծրագրերի համար, այդ թվում Սյունիքի մարզի զարգացման համար:
Նյութը հրապարակման պատրաստեց Կամո Խաչիկյանը
