Ընտրությունների արդյունքներն առողջ բանականության հետ կապ չունեն
ՔԱՂԱՔԱԿԱՆՈՒԹՅՈՒՆ
Հայաստանի վարչապետի պաշտոնակատար Նիկոլ Փաշինյանը և Ռուսաստանի նախագահ Վլադիմիր Պուտինը հուլիսի 7-ին հանդիպել են Մոսկվայում։ Հանդիպման ընթացքում ՌԴ նախագահն իր ելույթում խոսել է դժվար, սուր և զգայուն հարցերի լուծման մասին։
Այս թեմայով զրուցել ենք քաղաքագետ Արմեն Բաղդասարյանի հետ։
Հարցին, թե ի՞նչ է ենթադրում Պուտինի ասած բարդ, շատ սուր և զգայուն հարցերի լուծումը` քաղաքագետը պատասխանել է․ « Կարծում եմ, որ խոսքը երեք հիմնական բաների մասին է.
Առաջին՝ սահմանների դեմարկացիա-դելիմիտացիա, այսինքն՝ նաև Ադրբեջանի տարածքային ամբողջականության ընդունում:
Երկրորդ՝ Սյունիքով միջանցքի կամ ճանապարհի տրամադրում:
Երրորդ՝ փաստացի, Հայաստանի դուրսմղում արցախյան բանակցություններից, որովհետև, եթե Հայաստանը ճանաչում է Ադրբեջանի տարածքային ամբողջականությունը և Հայաստանն այլևս Արցախի անվտանգության երաշխավորը չէ, ուրեմն՝ մեծապես Հայաստանի դերը նվազում է այդ հարցում:
Կարծում եմ՝ այս երեք կետերը նկատի ուներ Վլադիմիր Պուտինը»։
Անդրադառնալով այն հացին, թե ինչպե՞ս եղավ, որ գործող իշխանությունները վերընտրվեցին, քանի որ քաղաքագետը նախքան ընտրությունները ասել էր, որ «առողջ տրամաբանությունն ասում է, որ իշխանությունը, որը ձախողել է առանց բացառության բոլոր ոլորտներում, չի կարող ունենալ բարձր վարկանիշ»` Արմեն Բաղդասարյանը պատասխանել է․ «Ես հիմա էլ եմ պնդում, որ գործող իշխանությունները ձախողել են բոլոր ոլորտները: Ես ասել էի, որ առողջ տրամաբանությունը հուշում է, որ գործող իշխանությունը բարձր վարկանիշ պետք է չունենա, հիմա ես ասում եմ, որ ընտրությունների արդյունքներն առողջ բանականության հետ կապ չունեն: Թող ներեն ինձ ընտրությունների մասնակիցները, բայց այս արդյունքներն ունեցած իշխանությունները պետք է այդքան ձայն չհավաքեին: Ի դեպ, ես մեծ վստահություն չունեմ ընտրությունների արդյունքների նկատմամբ, կարծում եմ, որ իշխանությունները չարաշահել են հնարավոր բոլոր լծակները, հնարավոր բոլոր ձևերով ազդել են ընտրությունների արդյունքների վրա, բայց, այնուամենայնիվ, այո՛, պետք է խոստովանենք, որ առաջին տեղում ՔՊ-ն է, ինչը շատ տարօրինակ էր, այդպես պետք է չլիներ: Դրա հետևանքները, ի դեպ, մենք դեռ տեսնելու ենք»:
Սոնա Գիշյան
