Հետապնդումները շարունակվում են առանց դադարի

Քաղաքական հակառակորդների դեմ քրեական հետապնդումները օրեցօր նոր թափ են հավաքում։ Նիկոլ Փաշինյանի իշխանությունն իր առջև հստակ խնդիր է դրել ձերբակալել կամ պաշտոնից ազատել ընդդիմադիր բոլոր համայնքապետերին, նշանակովի պաշտոնյաներին, իսկ նրանց փոխարեն այդ պաշտոններում նշանակել տալ կա՛մ «Քաղաքացիական պայմանագիր» կուսակցության անդամներին, կա՛մ էլ արբանյակ կուսակցությունների ներկայացուցիչներին։ Թեպետ վերջին օրերին առանձնակի դաժանությամբ հետապնդման են ենթարկվում Սյունիքի մարզի համայնքապետերը, մյուս մարզերում ևս իշխանությունը ձեռքերը ծալած չի նստում։

Մեր տեղեկությունների համաձայն՝ կառավարությունը բոլոր մարզպետներին հանձնարարել է ցուցակներ կազմել և դրանցում ընդգրկել առավել ըմբոստ ընդդիմադիրներին։ «Նախապատվությունը» տրվելու է «Վերածնվող Հայաստան» կուսակցությանը, որի անդամների նկատմամբ Նիկոլ Փաշինյանն առանձնակի կոշտ վերաբերմունք ունի։ Հետապնդումներից զերծ չեն մնա նաև ընդդիմադիր այլ կուսակցությունների անդամներ ևս։ Փաշինյանական իշխանությունն այժմ ակտիվ որոնումների մեջ է․ իրավապահների և իր կուսակցականների միջոցով ճշտում է, թե խորհրդարանական արտահերթ ընտրություններին ովքեր են աշխատել «Հայաստան» և «Պատիվ ունեմ» դաշինքների համար, փորձում են առանձին մարդկանց գտնել ընդդիմադիրների դեմ ցուցմունքներ կորզելու համար։ Գաղտնիք չէ, որ չնայած ստացած բարձր տոկոսներին՝ Փաշինյանը դժգոհ է առանձին համայնքներում իր ստացած քվեներից։ Իսկ առաջիկայում ՏԻՄ ընտրություններ են կայանալու մի քանի հարյուր համայնքներում։ Այդ ընտրություններում ընդդիմության համար ավելի հեշտ կլինի լուրջ դիրքեր գրավելը, և իշխանությունները փորձում են ամեն գնով խափանել նրանց ծրագրերը։

Շավարշ Մակարյան