Որո՞նք են լեզվի քաղցկեղի ախտանշաններն ու զարգացմանը նպաստող հիմնական գործոնները
ՀԱՍԱՐԱԿՈՒԹՅՈՒՆ
Լեզվի քաղցկեղն այս հիվանդության համեմատաբար քիչ հանդիպող տեսակներից մեկն է, սակայն այն այնուամենայնիվ շարունակում է համարվել ամենավտանգավոր հիվանդություններից մեկը, որը ժամանակին չհայտնաբերելու և բուժումը չսկսելու դեպքում կարող է դառնալ մահվան պատճառ։ Սա այն հիվանդություններից է, որոնց վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդության մասին հուշող ախտանշաններն իմանալը շատ կարևոր է։
Բրիտանական Cancer Research UK կազմակերպության ուռուցքաբանները ներկայացրել են քաղցկեղի այս տեսակի մասին հուշող հիմնական ախտանշանները, որոնք ժամանակին նկատելը կօգնի հնարավորինս շուտ սկսել բուժումն ու կանխել հետագա բարդացումը:
Բորբոքման կայուն օջախ
Լեզվի քաղցկեղի դեպքում լեզվի վրա կարող են ի հատ գալ բորբոքման օջախներ, որոնք շատ երկար ժամանակ չեն բուժվում: Նման դեպքերում բորբոքված հատվածը կարող է ունենալ կարմիր կամ սպիտակ բծի տեսք, որը ոչ մի դեպքում չի կարելի անուշադրության մատնել:
Նորագոյացություններ
Լեզվի քաղցկեղի մասին հուշող մյուս հավանական ախտանշանը նորագոյացությունն է, որը կարող է ունենալ խոցի, պնդացման կամ ելուստի տեսք և չապաքինվել երկար ժամանակ: Փորձագետների խոսքով՝ չարորակ նորագոյացությունները կարող են ի հայտ գալ ինչպես լեզվի վրա, այնպես էլ դրա տակ, ուստի հարկավոր է շատ ուշադիր լինել:
Արյունահոսություն
Ինչպես փաստում են ուռուցքաբանները, չարորակացման գործընթացի հետևանքով լեզուն կարող է շատ ավելի զգայուն դառնալ ու հեշտությամբ արյունահոսել անգամ չնչին վնասվածքի դեպքում, ուստի նման ախտանշան նկատելու դեպքում հարկավոր է անհապաղ դիմել բժշկին ու բուժզննում անցնել:
Ինչն է նպաստում լեզվի քաղցկեղի զարգացմանը
Մասնագետների խոսքով՝ վիճակագրական տվյալները ցույց են տվել, որ հիվանդության զարգացման հավանականությունը բարձրացնում են վատ սովորությունները, մասնավորապես, ծխախոտի գործածությունն ու ալկոհոլային խմիչքների չարաշահումը: Բացի այդ, բավական լուրջ ռիսկային գործոն կարող է հանդիսանալ նաև մարդու պապիլոմավիրուսով վարակումը, ուստի այս վիրուսի առկայութան դեպքում հարկավոր է շատ ավելի ուշադիր լինել ու կանոնավոր պրոֆիլակտիկ բուժզննում անցնել:
Նյութի աղբյուրը՝ medikforum.ru
