Հայալեզու նյութեր կարդալու միտումը նվազել է. Սերոբ Խաչատրյան
ՔԱՂԱՔԱԿԱՆՈՒԹՅՈՒՆ
Հայաստանում ընդունելության քննությունների նախնական պատկերը արդեն հայտնի է։ Այս թեմայով զրուցել ենք կրթության փորձագետ Սերոբ Խաչատրյանի հետ։ Հարցին, թե ինչպիսին է նախնական պատկերը փորձագետը պատասխանել է․ «Համավարակի պայմաններին համապատասխանեցված կրթության և ընդունելության քննությունների կազմակերպման համատեքստում չենք կարող ամբողջական ու իրական պատկեր արձանագրել, ինչպես սովորական տարիներին, բայց որոշ արձանագրումներ կարող ենք անել։ Այս տարի կարևոր էին «Հայոց լեզու», «Գրականություն» և «Մաթեմատիկա» առարկաների ցուցանիշները, որովհետև կառավարությունը թիրախային նպատակ էր սահմանել, որ 2021-ին «Հայոց լեզու և գրականություն» ու «Մաթեմատիկա» առարկաների միասնական քննության միջին գնահատականը 15 միավոր կլինի։ Կառավարությունը նաև արձանագրել էր, որ 2018-ին «Հայոց լեզվի և գրականության» միջին միավորը եղել էր 12.2, իսկ «Մաթեմատիկայինը»՝ 11.5՝ 20 բալանոց համակարգում։ Գնահատման և թեստավորման կենտրոնի հրապարակած նախնական արդյունքների համաձայն՝ «Մաթեմատիկայի» միջին միավորն այս տարի եղել է 10.47, իսկ «Հայոց լեզու և գրականություն» առարկայինը, 12.6, այսինքն՝ ոչ միայն չեն հասել թիրախին, դեռ մի բան էլ «Մաթեմատիկայի» միջին միավորն է նվազել։ «Հայոց պատմության» պարագայում ունենք շատ տարօրինակ բարձր միավորներ. դիմորդների մոտ 35%-ը ստացել է 18-20 միավոր։ Չեմ կարող ասել հստակ պատճառը, գուցե թեստն է հեշտ եղել, բայց եթե նման քաղաքականություն են որդեգրել, ապա պետք է պահպանել համաչափությունը, այսինքն՝ հեշտացնել բոլոր առարկաների թեստերը։ Համաչափության պահպանումը շատ կարևոր է, որովհետև այս տարի դիմորդներին հնարավորություն էր տրվել ընտրել կա՛մ հայոց լեզու, կա՛մ օտար լեզու։ Դիմորդների մեծ մասը ընտրել էր օտար լեզու, որովհետև օտար լեզվից ավելի հեշտ է բարձր միավորներ ստանալ, քան հայոց լեզվից»։
Հարցին թե, որն է խնդիրը, որ Հայոց լեզվի միջին միավորը չի հաղթահարել բավարարի շեմը մասնագետը պատասխանել է․ «Պատճառն այն է, որ հայոց լեզուն լավ իմանալու համար մարդիկ պետք է շատ կարդան, միայն պարապելով չէ։ Բայց եթե մենք այսօր հիմնականում կարդում ենք ֆեյսբուքյան գրառումներ, որոնց մի մասը լատինատառ է, մյուսն էլ՝ տառասխալներով, չենք կարող հայոց լեզվից լավ արդյունք ունենալ։ Հայալեզու նյութեր կարդալու միտումը նվազել է ընդհանրապես, դրա համար էլ ունենք այս արդյունքը»։
Սոնա Գիշյան
