Կուսակցական բռնապետություն․ ո՞վ չի հավատում ՔՊ ծրագրին
ՎԵՐԼՈՒԾՈՒԹՅՈՒՆՆԵՐ
Հայաստանի պետական կառավարման համակարգում պետք է աշխատեն մարդիկ, ովքեր հավատում են «Քաղաքացիական պայմանագիր» կուսակցության ծրագրին։ Անհեթեթ և վտանգավոր այս միտքը երկնել է Հայաստանի վարչապետի պաշտոնակատար Նիկոլ Փաշինյանը՝ նախօրեին կայացած կառավարության նիստում։ Վաղուց հայտնի իրողություն է, որ Փաշինյանի համար պաշտոնյաների նշանակումն իրականացվում է ոչ թե ըստ մասնագիտական հմտությունների, այլ ըստ կուսակցապետին անձնական նվիրվածության, քծնանքի, սեփական ինքնասիրությունը ոտատակ տալու հատկանիշների։ Սակայն առաջին անգամն է, որ Փաշինյանն այդ վայ-սկզբունքը բարձրաձայնում է կառավարության նիստում։
«Հայաստանի Հանրապետության քաղաքացիներն այդ ծրագրի իրագործման համար տվել են քվե, տվել են մանդատ, տվել են Կառավարություն և Ազգային ժողով ձևավորելու լիազորություն: Եվ եթե մենք 2018 թվականին այդպիսի շեշտադրում չենք արել՝ ելնելով իրադրության առանձնահատկություններից, ես ուզում եմ ասել, որ կառավարման ամբողջ համակարգի նպատակը շատ հստակ է՝ իրագործել առաջիկա 5 տարիների ընթացքում այն, ինչ գրված է «Քաղաքացիական պայմանագիր» կուսակցության նախընտրական ծրագրում, որը հաստատված է Հայաստանի Հանրապետության քաղաքացու քվեով: Եվ, հետևաբար, պետական կառավարման համակարգում պետք է աշխատեն մարդիկ, ովքեր հավատում են այդ ծրագրին, ովքեր այդ ծրագիրը համարում են իրենց աշխատանքային ուղեցույցը, և սա կարևոր նախապայման է»,- ասել է Փաշինյանն ու հավելել․
«Հետևաբար, նրանք, ովքեր չեն հավատում, չեն ընդունում, վերապահումներ ունեն, ինչը ժողովրդավարական հասարակությունում շատ նորմալ երևույթ է, և մենք դրան նույնպես նորմալ ենք վերաբերում, հետևաբար, նրանք, ովքեր խնդիր ունեն այդ առումով, մենք նրանց պետք է հաջողություն մաղթենք իրենց հետագա գործունեության մեջ»։
Քաղաքագետ Արմեն Բաղդասարյանն, օրինակ, կարծում է, թե Փաշինյանը փորձում է երկրում կուսակցական դիկտատուրա հաստատել, մինչդեռ Հայաստանը նման ռեսուրս չունի։ Փաշինյանն իր կուսակցական ծրագրի նկատմամբ հավատարմության երդում է պահանջում և չի խոսում կառավարման համակարգը պրոֆեսիոնալ, կարող ու պատասխանատու կադրերով համալրելու մասին, տարակուսում է քաղաքագետը։ Նշենք, որ նման մեթոդներով աշխատող պետական համակարգը պարզապես չի դիմանա, վերջնականապես կքանդվի։ Արդյո՞ք Փաշինյանը և նրա կողմնակիցները չեն հասկանում այդ վտանգը։ Դժվար թե․․․ Իսկ կուսակցական դիկտատուրայի դրվագներ համաշխարհային պատմության մեջ շատ են եղել, դրանց ավարտն ու հետևանքներն էլ բոլորովին դրական չեն եղել։
Սարգիս Վարդևանյան
