«Ձեռ ե՞ք առնում». Գաստիկը՝ տեսանյութերում իր, Ծըգլի եւ Տլեի երեւալու մասին

 Armtimes-ը գրում է.

Էրեբունի եւ Նուբարաշեն վարչական շրջանների ընդհանուր իրավասության դատարանում Երրորդմասցի Լյովիկի եւ նրա երկու ընկերների սպանության գործով այսօրվա դատական նիստի ընթացքում հետազոտվեցին գործով ապացույց ճանաչված տեսանյութերի արձանագրությունները:

Մեկ ժամից ավել դատավարության մասնակիցները (բացառությամբ գործով մեղադրող դատախազների,- հեղ.) եւ դահլիճում ներկա գտնվողները տեսախցիկների տեսագրություններում «փնտրում էին» գործով մեղադրյալներ Գաստիկին, Ծըգլին եւ Տլեին: Մասավորապես մեղադրող դատախազ Արամյանը ներկայացրեց մեղադրանքի հիմքում դրված ապացույց-տեսանյութերը՝ «ժամ-րոպեով» առանձնացված: Ցուցադրվեցին «Նոր Զովք» սուպերմարկետի տեսախցիկների տեսագրությունները:

Ըստ նախաքննական մարմնի եւ դատախազի` այնտեղ երեւում է 3 անձ, որոնց դեմքերը թեեւ չեն երեւում, բայց ամբաստանյալներն են: Հենց այս տեսանյութերից մեկում դատախազ Արամյանը համառորեն «տեսնում էր», նույնիսկ ձեռքով ցույց էր տալիս երեք անձի տեղաշարժ, մինչդեռ ամբաստանյալների պաշտպան Լուսինե Սահակյանը պնդում էր, որ երեւում է միայն մեկ անձի շարժ: «Ձեռ եք առնում էն մյուս երկուսն էլ կպել են իրա՞ր»,- հետաքրքրվեց ամբաստանյալ Գաստիկը, ինչին ի պատասխան նախագահող դատավոր Արտուշ Գաբրիելյանն ասաց. «Իյա՞, նոր իմացա՞ր»:

Դատավորը նախազգուշացրեց ամբաստանյալներին, որ այլեւս տեղից չխոսեն, իսկ դահլիճում գտնվող հարազատներին էլ «հորդորեց» տեղից չխոսել, այլապես սպառնաց նիստը դռնփակ անցկացնել: «Մեղադրող կողմին ձեռնտու է ցույց տալ, որ երեք անձի շարժ կա, մինչդեռ մեկ անձի շարժ է երեւում միայն, հետեւաբար, իրականությանը չի համապատասխանում վարույթն իրականացնող մարմնի ներկայացրած ապացույցը: Հարգելի՛ դատարան, առհասարակ ապացույցը, որը ներկայացվել է դատարան, որակի խնդիր ունի, ապացույցը պետք է համոզիչ լինի: Այս տեսանյութում նույնիսկ չի երեւում` այդ մեկ անձը կին է, թե տղամարդ, ծեր է, թե երեխա»,- նկատեց ամբաստանյալների պաշտպան Լուսինե Սահակյանը:

Ըստ նախաքննական տվյալների՝ երեք ամբաստանյալները դեպքի վայրից հետո գնացել են Նոր Նորք, այնտեղից տաքսիով Ավան թաղամասում գտնվող «Նոր Զովք» սուպերմարկետ, ապա «Միլենա» տաքսի ծառայություն: Ի սկզբանե գործի նյութերով, երեք ամբաստանյալները «կապիշոնով» են եղել: «Նոր Զովք» սուպերմարկետի տեսախցիկներից մեկի տեսագրությամբ «երեւացող» երեք անձինք, սակայն, կապյուշոնով չէին, այդ հանգամանքի վրա դատարանի ուշադրությունը հրավիրեց պաշտպան Լուսինե Սահակյանը՝ հավելելով. «Քննությամբ տվյալ ձեռք չի բերվել, որ այդ երեք անձը ճանապարհին փոխվել են:

Չի կարելի ամբողջ քաղաքի այդ օրվա տեսախցիկների տեսագրությունները հանել եւ հենց քայլող երեք անձ տեսնել, ասել` ուրեմն ամբաստանյալներն են»: Մեկ ուրիշ տեսագրությամբ, բազմաթիվ անձանց մեջ, մեղադրողը մի անձի առանձնացրեց, որն ըստ նրա՝ ամբաստանյալներից մեկն է. այդ անձը իբր դուրս է գալիս տաքսի ծառայությունից: Այդ կադրը ետ ու առաջ եղավ մի քանի անգամ, քանի որ այդպես էլ պարզ չէր, թե որտեղից է դուրս գալիս դատախազի կողմից մատնանշված տղամարդը: Դատարանն ուսումնասիրեց նաեւ Նորքի այգիներում ամբաստանյալների կողմից վարձակալած տան տեսախցիկների տեսագրությունը: Այդպիսով՝ առանձնատան հետեւի մասում գտնվող ավտոտնակի դարպասների մի փոքրիկ, կողային մասն էր երեւում ֆիքսված կադրերում:

Կողքից երեում էր, որ մի երիտասարդ բացում է ավտոտնակի դարպասը: Հետո կադրի կողային հատվածում երեւում էր «ՎԱԶ» մակնիշի սպիտակ մեքենայի կեսը: Տեսախցիկները, սակայն չէին ֆիքսել ամենակարեւորը՝ մեքենայի պետհամարանիշները, ինչպես նաեւ ավտոտնակից այդ մեքենայի դուրս գալը: Պաշտպան Լուսինե Սահակյանը նկատեց, որ զարմանալիորեն ֆիքսվել են միայն մեքենայի՝ ավտոտնակում տեղավորելու պահերը, սակայն ե՞րբ է այդ մեքենան ավտոտնակից դուրս եկել՝ դա ֆիքսված չէ:

Նշենք, որ ըստ գործի նյութերի «ՎԱԶ 21 07» մակնիշի ավտոմեքենա հայտանբերվել է «Նուբարաշեն» ՔԿՀ-ի ավտոկայանատեղիում: Հենց այդ մեքնեայի մեջ՝ ըստ նախաքննության տվյալների՝ դարանակալել են զինված անձինք եւ սպասել Երրորդմասցի Լյովիկի ժամանելուն:

Զննության արձանագրությունները հետազոտելուց հետո, Սահակյանը հայտարարեց, որ դիտված տեսանյութերը քննիչի կազմած զննության արձանագրությանը չեն համապատասխանում: «Տեսանյութերի զննության գործողության ժամանակ ներկա են եղել նաեւ ընթերականեր: Քննիչը արձանագրության մեջ ֆիքսել է՝ ինչ ցանկացել է, ընթերականերն էլ ստորագրել են արձանագրությունը՝ իբր՝ այն, ինչ արձանագրված է, իրենք տեսել են տեսանյութերում: Բայց մենք նայում ու չենք տեսնում»:

Այսպիսով՝ մոտ մեկ ժամ նիստերի դահլիճում գտնվողներն ու դատավարության մասնակիցները ներկայացված տեսագրությունների զննության արձանագրություններում այդպես էլ ոչ երեք կապյուշոններով երիտասարդների տեսան, ոչ էլ ամբաստանյալների դեմքերով կադրեր, քանի որ տեսագրություններում անցուդարձ անողները շատ էին:

Սույն գործով հաջորդ դատական նիստը տեղի կունենա դեկտեմբերի 20-ին, ժամը 12:00-ին: Հաջորդ դատական նիստի համար հատուկ տեսախցիկ է պետք, քանի որ նյութեր կան, որոնք փոքր «կասետի» վրա են:

Տաթև ԽԱՉԱՏՐՅԱՆ,