Ալիևի քիրվան․ Նիկոլ Փաշինյանը չի հերքում սկանդալային բացահայտումը

Վարչապետի պաշտոնակատար Նիկոլ Փաշինյանն ու իր կողմնակիցները մի սովորություն ունեն, երբ նրանց բռնացնում են վատ բան անելու մեջ, իրենց, մեղմ ասած, երկարականջ մի կենդանու տեղն են դնում, և այնպիսի կեցվածք ընդունում, թե ոչինչ էլ չի եղել։ Սուրբ Աթոռում Հայաստանի նախկին դեսպան Միքայել Մինասյանի՝ նախօրեին արած բացահայտումը բավարար էր, որ Փաշինյանն ու իր կողմնակիցներն ամոթից գետինը մտնեին, սակայն նրանք շարունակում են նույն անզուսպ ցինիզմով և լկտիությամբ իրենց քարոզարշավն անել, սպառնալիքներ տեղալ քաղաքական հակառակորդների հասցեին։ Երեկ Ջերմուկ քաղաքում, երբ լրագրողները վարչապետի պաշտոնազավթիչին հարցրել են, թե արդյոք հոկտեմբերի 10-ին ՌԴ նախագահ Վլադիմիր Պուտինի կողմից եղել է առաջարկ պատերազմը վերջնականապես դադարեցնելու վերաբերյալ, Փաշինյանն անպատասխան է թողել հարցը և մեգաֆոնով ողջունեց փողոցում իրեն դիմավորող ջերմուկցիներին: Չունի այդ մարդը պատասխան և վերջ։ Հո՞ չի ասի, որ ամենավերջին սրիկայի պես մերժել է բոլոր ողջամիտ առաջարկները, ինքնագլուխ շարունակել պատերազմն ու խայտառակ պարտության տարել հայկական զինուժը։ Չի ասի նաև, որ քարոզարշավի պայմաններում PR նպատակներով կարևոր քարտեզներ է նվիրել Ադրբեջանին՝ ընդամենը 15 գերու դիմաց։

Փաշինյանը չի ասում, փոխարենն այդ մասին ասում է նրա «կիրթ» գործընկեր Իլհամ Ալիևը, նշում, որ ականապատ դաշտերի քարտեզները մեծ առավելություն կտան Ադրբեջանին։

«Հայաստանը հանդես է եկել որպես երաշխավոր, և ականների վայրերը ճիշտ են նշված: Հայաստանը փոխանցել է Աղդամի շրջանի 97 հազար ականների քարտեզներ, որոնցից 54 հազար միավորը հակատանկային են, մնացածը՝ հակահետևակային ականներ։ Եթե մենք ստանանք բոլոր ականապատ տարածքների քարտեզները, ապա դա մեծ առավելություն կլինի, այլապես այդ աշխատանքները կտևեն 10 տարի»,-ասել է նա:

Իսկ Հայաստա՞նը․․․ Հայաստանը շանս ունի, եզակի, վերջին շանս՝ Ալիևի խամաճիկը դարձածների իշխանությունից հունիսի 20-ին ազատագրվելու, մեջքը շտկելու, լրջանալու և դեպի ուժեղ Հայաստան գնալու։ 

Գրիգոր Պետրոսյան