Գերիների ճակատագիրը շատ կարևոր է, չափազանց կարևոր է նաև անվտանգության հարցը, հիմա մենք երկընտրանքի առջև ենք․ Արցախի արտգործնախարարը՝ ականապատ տարածքների քարտեզներն Ադրբեջանին հանձնելու մասին

Ադրբեջանը երբեք իր նպատակների մասին չի թաքցրել, մենք այդ մասին խոսել ենք երկար տարիներ և միշտ ընդգծել ենք, որ նրանք ամենաազնիվ թշնամիներն են՝միշտ խոսել են իրենց ցանկությունների մասին։ Tert.am-ի հետ զրույցում այս մասին ասաց Արցախի արտաքին գործերի նախարար Դավիթ Բաբայանը՝ անդրադառնալով նրան, որ Ադրբեջանը գերիների փաստը որպես խաղաքարտ է օգտագործում՝ իր կողմից Արցախի օկուպացված տարածքների ականապատված հատվածների քարտեզները վերցնելու համար։

«Հիմա ունենք այն, ինչ ունենք։ Նրանք չեն փոխվելու։ Եթե որևէ մեկը իլյուզյաների մեջ է, դա վատ է։ Նրանք իրենց պարտականությունը շատ հստակ իրականացնում են»,- ասաց նա։

Հիշեցնենք, որ ադրբեջանական լրատվամիջոցները հրապարակել են երկրի նախագահ Իլհամ Ալիևի, Թուրքիայի նախագահ Ռեջեփ Թայիփ Էրդողանի և նրա կնոջ` Էմինե Էրդողանի` հունիսի 15-ին դեպի Շուշի ուղևորվելու ժամանակ տեղի ունեցած զրույցից մի հատված, որը վերաբերում է օրերս 15 հայ գերու վերադարձին և դրա դիմաց Լեռնային Ղարաբաղի ականապատ տարածքների քարտեզների փոխանցմանը:

Դավիթ Բաբայանի խոսքով՝ իրավիճակը բարդ է, բայց ինքը չէ այն մարդը, որին պետք հարց ուղղել, թե արդյոք համարժեք է մեր կողմից քարտեզների տրամադրումը՝ գերիների ստացման դիմաց։ «Իհարկե, գերիների, պատանդների ճակատագիրը շատ կարևոր է։ Բայց մյուս կողմից էլ՝ չափազանց կարևոր է անվտանգության հարցը։ Հիմա մենք կանգնած ենք երկընտրանքի առջև, շատ բարդ երկընտրանքի առջև»,- ասաց նա։

Արցախի արտգործնախարարը նկատեց՝ հիմա մենք անգամ չգիտենք գերիների հստակ թիվը, Ադրբեջանն այն գաղտնի է պահում, և երբևիցե չեն էլ ասելու, քանի որ կան «նուրբ խնդիրներ»։ «Մենք բարձրաձայնել ենք դրանց մասին, հայտարարել ենք, որ չի բացառվում, որ նույնիսկ օրգաններ վաճառեն ապօրինի ձևով։ Դրա մասին մենք տեղեկացրել ենք տարբեր միջազգային ատյանների, բայց հիմա ունենք այն, ինչ ունենք»,- ասաց նա։

Նրա խոսքով՝ այս պահի դրությամբ քանի դեռ ռուս խաղաղապահներն այստեղ են, լայնածավալ պատերազմական գործողություններ հնարավոր չեն։ «Բայց մենք մեր սեփական անվտանգության մեխանիզմները պետք է ունենանք։ Տեսնենք՝ ժամանակը ցույց կտա»,- ասաց նա։

Պատասխանելով դիտարկմանը, թե կարելի է այս իրավիճակում հայտարարել, որ Ադրբեջանի նախագահ Ալիևը կառուցողական է, երբ մենք էլ մեր կողմից տվել ենք մեր ունենածը՝ գերիների վերադարձի դիմաց, Դավիթ Բաբայանը նշեց․ «Ես ժամանակին խոսել եմ, հիմա էլ չեմ ուզում, իրավունք էլ չունեմ Արցախը դարձնելու շահարկումների առարկա, այս կամ գործչի որակումները մեկնաբանել։ Կասեմ միայն մեկ բան՝ ամեն ազգ արժանի է իր ղեկավարությանը, ղեկավարությունն իր ժողովրդի բարեյահոգեբանական վիճակի հայելին է։ Կառուցողակա՞ն է Ալիևը, թե՝ ոչ, ամեն մարդ իր համար պետք է նախանշի։ Նման որոկավորումների հիմքը տարբեր բաներ են՝ գիտելիքն է, բարոյահոգեբանական կառուցվածքն է, տեսլականն է։ Ալիևը կառոցողական է որոշ ասպարեզներում․ կառուցում է հայ ազգի գերեզմանաքարը։ Սա փաստ է։ Դա նրա կառուցողական բնութագիրներից է։ Ես դա ասել եմ ժամանակին, հիմա էլ կրկնում եմ»,- ասաց նա։

Մեկ այլ դիտարկմանը, թե Ադրբեջանը կարծես թե որոշել է այլ տարածքների ականապատված հատվածների քարտեզներն էլ վերցնել, որոնք նաև պաշտոնական Ստեփանակերտի մոտ են նաև, որն է իրենց դիրքորոշոմը, Դավիթ Բաբայանը պատասխանեց․ «Պայմանավորվածությունն ո՞ւմ միջև է ձեռք բերվել։ Կարծում եմ՝ ճիշտ կլինի՝ նրանց այդ հարցով դիմել, որպեսզի շահարկումներ չլինեն, Արցախը չդարձնեն ներքաղաքական խաղերի առարկա։ Մենք իրավունք չունենք դա թույլ տալու»:

Իսկ թե արդյոք մտահոգություններ կան Արցախի շուրջ եղած գործընթացների հետ կապված, Դավիթ Բաբայանի խոսքով՝ դրանք վերաբերում են թուրք-ադրբեջանական ալյանսի նպատակներին։

«Բայց ասեմ մի բան՝ ամեն ինչ հնարավոր է կանխել։ Հնարավոր է շատ բան չեզոքացնել։ Ամեն ինչ կախված է մեզնից։ Այլ տեղ չպետք է դա փնտրել։ Նույնիսկ այս կաթվածահար վիճակում մենք ի վիճակի ենք համախմբվել, վերանայել շատ բաներ, դասեր քաղել, դարձի գալ։ Այդ դեպքում լրիվ այլ իրավիճակ կարող է ստացվել մի քանի տարվա ընթացքում, ճիշտ քայլերի, հաշվարկների արդյունքում»,- ասաց նա։

Անդրադառնալով Թուրքիայի նախագահ Ռեջեփ Էրդողանի Շուշի այցին՝ Դավիթ Բաբայանը նշեց, որ դա նշանակում է, որ Թուրքիան և Ադրբեջանը չեն վերանայել իրենց մոտեցումը, դիրքորոշումն մեզ վերաբերող հարցերի նկատմամբ։

«Այլ բան է, որ մեզանում որոշ շրջանակներ այլ կարծիք ունեն։ Այս այցելության ընթացքում նրանց կողմից հնչեցված գաղափարները, մտքերը ոչ այլ ինչ են, քան ճանապարհային քարտեզ։ Կրկնում եմ՝ Թուրքիան ու Ադրբեջանն էլ ամենաազնիվ թշնամիներն են, երբեք չեն թաքցրել իրենց նպատակները։ Նրաք երբևիցե ասե՞լ են մի բան, որն իրականությանը չի համապատասխանում։ Ասել են, որ նրանց նպատակը՝ մեր ոչնչացումն է։ Հիմա եթե ադեկվատ չեն դրան վերաբերում որոշ մարդիկ, հասարակությանը, արդեն նրանց խնդիրը չէ, մեր խնդիրն է»,- ասաց նա։