Նիկոլիզմը՝ վտանգ երկրի և պետականության համար

2018 թվականին գալով իշխանության՝ «Քաղաքացիական պայմանագիր» կուսակցության պարագլուխ Նիկոլ Փաշինյանն ի լուր աշխարհի ազդարարեց, թե իրենց իշխանությունը որևէ «իզմ» չի դավանում։ Այդուհանդերձ, ապագայի քաղաքագիտական ձեռնարկներում Փաշինյանն իր մեկ «իզմ»-ի ներդրումը կունենա՝ նիկոլիզմի։ Այդ «գաղափարախոսությունն» են դավանում Նիկոլ Փաշինյանն ու իր կողմնակիցները, իսկ դրա հիմքում անսանձ ստախոսությունն է, ահռելի մանիպուլյացիան և մարդկային, բարոյական ու քաղաքական անսկզբունքայնության գերդոզավորումը։ Անհրաժեշտության պահին Փաշինյանը կարող է ցանկացած գաղափար երկնել՝ մարդկանց խաբելու և իր կողմը գրավելու համար։ Կարող է լինել սոցիալիստ կամ պահպանողական, դեմոկրատ կամ կոմունիստ, անարխիստ կամ ռոյալիստ, կարևորը՝ վարկանիշի վերջին փշուրները բոլոր մեթոդներով պահպանելու իր ձգտումն է։

 

Այժմ էլ Նիկոլ Փաշինյանը իր տգետ ընտրազանգվածին գրգռելու նոր թիրախ է գտել, ոչ ավելի, ոչ պակաս դասակարգային պայքարի կոչեր է հնչեցնում։ Նա վաղոց հասկացել է՝ ողջամիտ և գիտակից մարդիկ այլևս իր հենարանը չեն, ավելին, վտանգ են ներկայացնում իր իշխանության համար։ Նրա միակ ընտրողը կարող է լինել չքավոր, կրթական ցածր ցենզ ու բարոյական ստորին նշաձողեր ունեցող մարդը։ Իսկ այդպիսիներին կարելի է գրգռել միայն հարուստներին կողոպտելու, նրանց ունեցվածքը խլելու և վերաբաժանելու թեզերով։ Եթե Նիկոլ Փաշինյանն ինքը հավատար իր հայտարարություններին, կարելի էր նրան առաջարկել դասակարգային պայքարը սկսել իր ընտրական ցուցակից, օրինակ, չքավոր ՔՊ-ականները ունեզրկեին Խաչատուր Սուքիասյանին և Գուրգեն Արսենյանին։

Նիկոլ Փաշինյանի թիրախն այժմ պետական աշխատողներն են, գործարարները, գիտնականները, որոնք ոչ միայն չեն ընտրելու «Քաղաքացիական պայմանագրին», այլև վտանգում են նրա իշխանությունը։ Քարոզարշավի առաջիկա օրերին, չենք զարմանա, որ վարչապետի պաշտոնակատարը «պրոլետարիատի» հեղափոխություն հայտարարի, իսկ մինչ այդ գիտակից մարդիկ պետք է բոլոր ջանքերը գործադրեն Հայաստանից նիկոլիզմի հիմքերը խարխլելու համար։