Փաշինյանի միակ հույսը ժեխն է և նրա ստորագույն բնազդը

Խորհրդարանական արտահերթ ընտրությունների պաշտոնական քարոզարշավը միայն երկու օր է ինչ սկսվել է, սակայն արդեն հասցրել է ցնցել իր ցինիզմով և լպիրշությամբ։ Մեկ արձանագրում կարելի է այլևս անդառնալիորեն անել․ Նիկոլ Փաշինյանի միակ հույսն այս ընտրություններում ժեխն է, որի ստորագույն բնազդները շահագործելով էլ «Քաղաքացիական պայմանագրի» առաջնորդը փորձում է մնալ ջրի երեսին։

Տղամարդկության հետ լուրջ խնդիրներ ունեցող Փաշինյանն իրեն «մաչո» է երևակայում, քարոզչական հանդիպումների ժամանակ հայհոյանքներ շռայլում մրցակիցների հասցեին, ընդհուպ ոտնատակ տալու սպառնալիքներ տալիս, խոստանում «շինել»։ Ակնհայտ է՝ Փաշինյանը որդեգրել է քարոզարշավը ժողովրդական լայն զանգվածների միայն ցածրագույն զգացմունքներին ու բնազդներին ուղղելու տակտիկա, սոցիալապես խոցելի խավերի մոտ գրգռում, թշնամության զգացում, ինքնադատաստանի կոչեր անում։ Արդարադատության համակարգը հիմնովին վարկաբեկած Փաշինյանը երեք տարի շարունակ այդպես էլ հստակ ու փաստարկված որևէ մեղադրանք չի կարողացել առաջադրել իր ասած «նախկիններին», սակայն շարունակում է գրգռել մարդկանց։ Հարկավ, այդ մարտավարությունը լրջագույն վտանգներ է պարունակում երկրի համար, իզուր չէ, որ քաղաքական վերլուծաբանները նախազգուշացնում են հնարավոր բախումների և քաղաքացիական պատերազմի վտանգի մասին։ Բնականաբար, նման ագրեսիվ և լկտի հռետորաբանությունը, Փաշինյանի գրանցած արժեքային ստորագույն անկումը, նրա կողմնակիցների վարքը չեն կարող գրավել մտավոր կարողություններ ունեցող որևէ անձի։

Փաշինյանը գիտի իր ընտրազանգվածին, նրա որակն ու դաստիարակությունը, և հենց այդ «ժեխի» համար էլ բեմադրում է այս գռեհիկ թատրոնը՝ մե՛կ մենամարտի կանչելով Ռոբերտ Քոչարյանին, մե՛կ վիրավորելով Լևոն Տեր-Պետրոսյանին, մե՛րթ էլ սուտ տեղեկություներ տարածելով Սերժ Սարգսյանի մասին։

Դանիել Ստեփանյան