Ռոբերտ Քոչարյանը պատրաստվում է հաղթել մեկ փուլով

«Հայաստան» դաշինքը պատրաստվում է խորհրդարանական արտահերթ ընտրություններում հաղթանակ տանել հենց առաջին փուլում։ 1or.am կայքի տեղեկություններով՝ Ռոբերտ Քոչարյանը դաշինքի ներկայացուցիչների հետ զրույցում նշել է, թե արդեն այսօր՝ քարոզարշավի սկզբում, կան բոլոր շանսերը հենց առաջին փուլում հաղթանակ տանելու գործող իշխանության նկատմամբ։ Քոչարյանը վստահ է՝ հնարավոր է այլ՝ ԱԺ անցնելու շանս ունեցող հականիկոլական ուժերի հետ ընդհանուր հայտարարի գալ, և վարչապետի աթոռից պոկել Նիկոլ Փաշինյանին։ Նա նկատել է, թե Փաշինյանը կոտրված է, այլևս չի տիրապետում պետական համակարգին, որը դուրս է եկել վերահսկողությունից։

 

Ընդդիմադիր հիմնական դաշինքի վճռականությունը, նշենք՝ հունից հանում է Փաշինյանին, որն օրեցօր կորցնում է ինքնատիրապետումը, իսկ նրա տրամադրությունը փոխանցվում է իր կողմնակիցներին, որոնցից շատերն ուղիներ են փնտրում ընդդիմության հետ կամուրջներ գցելու, իրենց արածներն ապաշխարհելու համար։ Ուստի երկրորդ նախագահը կողմնակիցներին հորդորել է ոչ թե պատրաստվել երկրորդ փուլին, ինչպես ավելի վաղ էր կանխատեսվում, այլ շարունակել գրագետ և վստահ քարոզարշավը՝ հենց առաջին իսկ փուլում հաղթանակ տանելու համար։ Քննարկվում է նույնիսկ անցումային կառավարություն կազմելու հնարավորությունը, իսկ արդեն Փաշինյանին հեռացնելուց և երկիրը անդունդից հանելուց հետո քաղաքական ուժերը կկարողանան առողջացնել երկրի մթնոլորտն ու քաղաքական կյանքը։ «Հայաստան» դաշինքի քարոզարշավը, նշենք, որ մտահոգել է գործող իշխանություններին։ Նախկինում 60 տոկոս և ավելի քվեներով հաղթելու մասին տարփողող Փաշինյանն էլ օրերս իր կողմնակիցներին հրահանգել էր պատրաստվել երկրորդ փուլի, ինչը հարուցել էր իմքայլականների խուճապը։