Քարոզարշավը մեկնարկեց․ Նիկոլ Փաշինյանը կրկին մեղքը բարդում է նախկինների վրա
ՎԵՐԼՈՒԾՈՒԹՅՈՒՆՆԵՐ
Հայաստանում այսօր մեկնարկեց խորհրդարանական արտահերթ ընտրությունների պաշտոնական քարոզարշավը, թեև այն իրականում սկսվել էր վաղուց և ընթանում էր ողջ թափով։ Ընտրություններին մասնակցող քաղաքական ուժերը Երևանում և մարզերում հանդիպումներ են ունենում, ներկայացնում իրենց նախընտրական ծրագիրը։ Նախօրեին իր ծրագիրը ներկայացրել է նաև իշխող «Քաղաքացիական պայմանագիրը»։ Հայաստանի ապագան վտանգած ու ընտրություններին «Ապագա կա» կարգախոսով մասնակցող քաղաքական խառնամբոխի ցինիզմը բավարարել է գեղեցիկ ու վեհ բառերի կույտ գրել, թե ինչ են անելու անվտանգության և արտաքին քաղաքականության, տնտեսության, մարդկային կապիտալի զարգացման, իրավունքի և արդարադատության, ինստիտուցիոնալ զարգացման, շրջակա միջավայրի պահպանության և բնական ռեսուրսների կայուն կառավարման ոլորտներում։ Իհարկե, առանձնակի լպիրշություն է, երբ պետական բոլոր ինստիտուտները ոչնչացրած և վարկաբեկած Փաշինյանը դեռ շարունակում է խոսել ինստիտուցիոնալ զարգացումից, էլ չասած անվտանգության և արտաքին քաղաքականության մասին։ Նույն իրավիճակն է նաև մյուս ոլորտների դեպքում։
Փաշինյանի կառավարությունը հիմնովին ձախողվել է տնտեսության, մարդկային կապիտալի զարգացման, շրջակա միջավայրի ոլորտներում, իսկ արարադատության ոլորտը երեք տարի պարզապես ատամներով դիմադրել է փաշինյանական թանձրամիտների ամենօրյա հարձակումներին։ Եվ ոչ մի բառ սեփական մեղքերի, երկրի կառավարումը ձախողելու, պատերազմի և համավարակի հազարավոր զոհերի մասին, Փաշինյանն իրեն մեղավոր չի զգում։ Նա քարոզարշավի մեկնարկին ուղերձ է հղել, որում գրեթե բառացի մեղադրանքներ է հղել Հայաստանի նախկին իշխանություններին։
«Այն պահին, երբ սկսեցինք չհանդուրժել, մեր հայրենիքն արդեն նմանվում էր անդունդ գահավիժող մի մեքենայի, որին փորձում էինք կառավարել՝ առանց ղեկի ու անիվների, առանց արգելակի ու շարժիչի»,- գրել է Փաշինյանն ու հավելել․ «Ես ուզում եմ, որ քեզ ենթարկես ժամանակը, որովհետև այն ժամանակը, որ քեզ ենթակա չէր երեկ, մեր այսօրվա կորուստների առանցքային պատճառն է: Այսօրվա մեր դառնությունը կուտակվել է երեկ»:
ՀՀ քաղաքացին ունի հնարավորություն կանգնեցնելու արատավոր ընթացքը, որպեսզի վաղվա օրը նոր դառնություն չբերի։ Դրա համար բավարար է գնալ ընտրատեղամասեր և քվեարկել գործող հանցավոր իշխանության դեմ։
Դանիել Հակոբյան
