Իշխանությունը զավթած ծաղրածուներին աղբանոցը նետելու ժամանակը
ՎԵՐԼՈՒԾՈՒԹՅՈՒՆՆԵՐ
Հայաստանի անկախության 30 տարիներին կատարվեց այն, ինչից ամենաշատն էինք վախենում․ երկրի ղեկին է գտնվում ծաղրածու՝ այդ բառի ամենավատ իմաստով։ Վարչապետի աթոռին համառորեն սոսնձված Նիկոլ Փաշինյանը դարձել է ծաղրի առարկա բոլորի համար։ Նրան ծաղրում են թե՛ դրսում, թե՛ երկրի ներսում, ծաղրում են թե՛ կողմնակիցները, թե՛ հակառակորդները։ Հայաստանի դե-յուրե ղեկավարին վաղուց արդեն լուրջ չեն ընդունում գերտերություններն ու միջազգային կառույցները, իսկ 44-օրյա պարտությունից հետո ընդհանրապես նրա հետ հաշվի չեն նստում։ Նիկոլ Փաշինյանին լուրջ չեն ընդունում անգամ ներկայիս կողմնակիցները, որոնք նրանից կառչած են մնում միայն մի պատճառով՝ իշխանությունը չկորցնելու ահից։
Պաշտոնական քարոզարշավը դեռ չմեկնարկած՝ Նիկոլ Փաշինյանին ծաղրում են նաև քաղաքական մրցակիցները։ «Քաղաքացիական պայմանագիրն» ու նրա տխրահռչակ պարագլուխն իրենց ծաղրելու շանս են տվել բոլորին, և նրանք լիուլի օգտվում են այդ շանսից, ափսոս, որ այդ ընթացքում տուժում է պետության վարկն ու հեղինակությունը։ Հայաստանի նախկին երեք նախագահները, իրենց լավ և վատ կողմերով հանդերձ, միջազգային ասպարեզում էլ, երկրի ներսում էլ ընկալվում էին որպես լուրջ գործիչներ, որոնց հետ հաշվի էին նստում։
«Հայաստան» դաշինքի ղեկավար, երկրորդ նախագահ Ռոբերտ Քոչարյանն էլ իր կողմնակիցների հետ հանդիպմանը կրկին անդրադարձել է Փաշինյանի պահվածքին, իր լուսանկարը հանդիպումներում ցույց տալու փաստին։
«Հիմա եթե ավտոգրաֆ է ուզում, կարող եմ մակագրել, ամսի 21-ին ավտոգրաֆ կտամ»,- ասել է Քոչարյանը՝ հարուցելով հավաքվածների բուռն ծիծաղը։
Երրորդ նախագահ Սերժ Սարգսյանն ավելի կոշտ է արտահայտվել։
«Եթե ինքն այ էսքան արժանապատվություն ունենար, ինքնասպան կլիներ: Եթե ես լինեի գլխավոր գերագույն հրամանատար, երդվում եմ, ինքնասպան կլինեի։ Ես ինձ ուղղակի կգնդակահարեի։ Ո՞ւմ ա պետք այդպիսի կյանքը․ 5000 հոգու մահ խղճիդ, COVID-ի 5000-ը չեմ ասում։ Բացի այդ, ջախջախված զորք, ադրբեջանցին քեզ ծաղրում է, 10 կոպեկանոց է դարձնում։ Ասում է՝ դու ո՞վ ես, որ քեզ հաղթած լինեմ, դու փալասի մեկն ես»,- պատկերավոր նշել է Սերժ Սարգսյանը։
Նիկոլ Փաշինյանը ինքն էլ միտումնավոր անլրջացնում է քարոզարշավը՝ այդկերպ փորձելով ձայներ խլել օրեցօր թափ հավաքող մրցակիցներից, սակայն, ինչպես սովորաբար լինում է Փաշինյանի դեպքում, այս անգամ էլ է ձախողվելու։ Արձանագրենք, որ Նիկոլ Փաշինյանն ու իր խառնիճաղանջ թիմը ծաղրածուների ամբոխ են, որոնք երևանյան կրկեսի՝ 10 տարի չգործելու պայմաններում հայտնվել են երկրի ղեկին և դեպի անդունդն են գլորում Հայաստանի Հանրապետությունը։
Կարեն Գինոսյան
