Ամերիկացի գիտնականը նախազգուշացրել է COVID-26-ի և COVID-32-ի վտանգի մասին
ՀԱՍԱՐԱԿՈՒԹՅՈՒՆ
Ria.ru-ն գրում է, որ կորոնավիրուսի և վարակիչ հիվանդությունների գծով ամերիկացի փորձագետ Պիտեր Հոտեզը հայտարարել է, որ անհրաժեշտ է մանրակրկիտ ուսումնասիրել COVID-19-ի ծագումը, հակառակ դեպքում մարդկությունը կարող է բախվել COVID-26-ի և COVID-32-ի հետ:
«Սա 21-րդ դարում արդեն երրորդ խոշոր կորոնավիրուսային համաճարակն է կամ պանդեմիան (SARS-ից և MERS-ից հետո) ... Սա անընդմեջ երրորդն է: Մայր բնությունը հուշում է մեզ, թե ինչ կլինի. կլինեն COVID-26 և COVID-32, եթե մենք լիովին չպարզենք COVID-19 ծագումը», - ասել է փորձագետը NBC News- ի եթերում:
Հոտեզը շեշտել է, որ անհրաժեշտ է հետաքննել նոր կորոնավիրուսի «բռնկման դեպքը»: Դրա համար վիրուսաբաններ, համաճարակաբաններ և այլ մասնագետներ պետք է ուղարկվեն Չինաստանի Ուհան քաղաք, որտեղ սկսվել է համաճարակը: Տեղում նրանք պետք է հավաքեն տվյալներ և անհրաժեշտ նմուշներ: Միևնույն ժամանակ, փորձագետը նշել է, որ առանց այդ հարցի շուրջ Չինաստանի հետ համագործակցության դժվար կլինի կորոնավիրուսի ծագման մասին տեղեկատվություն ստանալ:
«Կարծում եմ, որ մենք նույնիսկ պետք է ուժեղ ճնշում գործադրենք Չինաստանի վրա, ներառյալ հնարավոր պատժամիջոցները, որպեսզի Չինաստանը թույլատրի համաճարակաբանների և վիրուսաբանների խմբին անարգել մուտք գործել ամեն տեղ, կենդանիներից, մարդկանցից և լաբորատորիաներից նմուշներ վերցնել», - ասաց Հոտեզը:
Ավելի վաղ, Սպիտակ տունը տարածել էր հաղորդագրություն, համաձայն որի` գիտական լաբորատորիայում արտակարգ իրավիճակի պատճառով կորոնավիրուսի տարածման վարկածը դեռ չի բացառվում: Հաղորդագրության մեջ մեջբերվել են ԱՄՆ նախագահ Ջո Բայդենի խոսքերը առ այն, որ երկրի հետախուզական ծառայությունն ընդունում է վիրուսի ծագման երկու վարկած՝ կենդանիներից կամ լաբորատորիայից մարդկանց փոխանցվելը:
Նյութը հրապարակման պատրաստեց Կամո Խաչիկյանը
