Նախկին լրագրող Փաշինյանի իշխանությունը՝ ընդդեմ մամուլի

Հայաստանի անկախության 30 տարիների ընթացքում ամենաշատ լրագրողները մաս են կազմել գործող իշխանությանը։ Նույնիսկ պետության ղեկավարի պաշտոնում հայտնված անձն է լրագրող։ Եվ լրագրողների դեմ հարձակումները, նրանց աշխատանքի խոչընդոտումների ամենամեծ թիվն էլ արձանագրվում է հենց այս իշխանությունների օրոք։ Օր չկա, որ որևէ միջադեպ չարձանագրվի։ Լրագրողները դարձել են իշխանական պատգամավորների, վարչապետի թիկնապահների, իրենց աջակիցների թիրախը։ Նախօրեին «Իմ քայլը» խմբակցության պատգամավոր Հայկ Սարգսյանն էր փողոցում գողացել իրեն տեսագրող լրագրողի հեռախոսը և փախուստի դիմել մեքենայով։ Մեկ ժամ անց հեռախոսը վերադարձրել էին՝ տեսանյութը ջնջված վիճակում, իսկ տխրահռչակ «շիշ բռնողը» խորհրդարանում ճամարտակում էր լրագրողների աշխատանքի նրբությունների վերաբերյալ։

Մեկ այլ միջադեպ էլ տեղի էր ունեցել երեկ, Արարատի մարզում։ Վարչապետի պաշտոնակատարի այցի ժամանակ նիկոլական ժեխը հարձակվել և խլել էր Tert.am-ի թղթակցի հեռախոսը։ Լրագրողի աշխատանքը Արարատի մարզում պարբերաբար խոչընդոտել են, քաշքշել և վիրավորել, իսկ իրավապահները դժկամությամբ են արձագանքում, միայն զգուշացումից հետո վերադարձրել են հեռախոսը։ Լրագրողների աշխատանքի խոչընդոտումը միայն Փաշինյանի աջակիցների կողմից չէ, որ լինում է։ Նրա մամուլի քարտուղար, մեկ այլ նախկին լրագրող Մանե Գևորգյանն էլ քանիցս աչքի է ընկել նման լպիրշ կեցվածքով, խանգարել նկարահանումներին, բառացիորեն «ռազբորկա» սկսել Փաշինյանին ոչ այնքան հաճելի հարցեր տվող լրագրողների հետ։ Ժամանակին ինչ աղմուկ-աղաղակ կբարձրանար, եթե որևէ լրագրողի աշխատանք խոչընդոտվեր, նույն Նիկոլ Փաշինյանն այդ մասին կբարբառեր խորհրդարանի ամբիոնից՝ իշխանությունների հասցեին ամենախիստ մեղադրանքները հնչեցնելով։ Իսկ այսօր նիկոլական ժեխն իրեն թույլ է տալիս լրատվամիջոցի դեմ հարձակում գործել, և իրենց հոգեգար առաջնորդն ու նրա կողմնակիցները որևէ կերպ չեն արձագանքում։ Ընդհակառակը, խրախուսում են իշխանությանը քննադատող լրատվամիջոցներին խոչընդոտելու փորձերը։

Տիգրան Պողոսյան