Արդյո՞ք կորոնավիրուսը փոխանցվում է մայրական կաթով
ՀԱՍԱՐԱԿՈՒԹՅՈՒՆ
aif.ru-ն գրում է, որ ըստ նեոնատոլոգիայի ոլորտի հայտնի փորձագետ, պրոֆեսոր Սերտակ Արսլանօղլուի (Թուրքիա), այս պահին չկա որևէ ապացույց, որ կորոնավիրուսը կարող է փոխանցվել կրծքի կաթով: Իսկ կրծքով կերակրելու կարողությունը կախված է կորոնավիրուսային վարակ ունեցող կնոջ վիճակի ծանրությունից:
«Սուր վարակի շրջանում դա հնարավոր չէ անել, իսկ երբ վիճակն ավելի կայուն է դառնում, հնարավոր է սկսել, բայց կինը պետք է օգտագործի բոլոր անհրաժեշտ նախազգուշական միջոցառումները: Իհարկե, կերակրման ժամանակ հնարավոր չէ պահպանել 1,5 մ սոցիալական հեռավորություն, ուստի վարակը երեխային փոխանցելու ռիսկը մնում է: Այնուամենայնիվ, Ամերիկյան մանկաբուժության ակադեմիան, որը համաճարակի սկզբում վարակված կանանց խորհուրդ էր տալիս զգուշություն ցուցաբերել և զերծ մնալ երեխաների հետ անմիջական շփումից, հետագայում փոխել է իր դիրքորոշումը: Ներկայիս ցուցումը հետևյալն է. նույնիսկ չնայած հիվանդությանը, մայրը պետք է կրծքով կերակրի իր երեխային, եթե նա իրեն լավ է զգում», - շեշտել է Արսլանօղլուն:
Ռուս բժիշկները ևս նույն կարծիքին են: Օրինակ՝ Կուլակովի անվան մանկաբարձության, գինեկոլոգիայի և պերինատոլոգիայի ազգային բժշկական հետազոտությունների կենտրոնի ինստիտուտի պրոֆեսոր Դմիտրի Դեգտերևը ասել է, որ անցյալ տարի համաճարակի ամենաթեժ շրջանում իրենց կենտրոնում ծննդաբերել է COVID-19-ով հիվանդ 42 կին, բայց նորածիններից ոչ մեկը չի հիվանդացել: Իր դերն է խաղացել այն փաստը, որ հաստատությունը խստորեն կարանտին է պահպանել՝ բաժանելով մայրերին ու երեխաներին: Բայց, չնայած այն հանգամանքին, որ նորածինները պաշտպանված են եղել կորոնավիրուսային վարակից, ներհիվանդանոցային թարախային-սեպտիկ հիվանդությունների տոկոսն է զգալիորեն աճել: Բանն այն է, որ դրանից նորածինները պաշտպանվում են մայրական կաթով, որից զրկվել են այդ երեխաները:
«Եթե Ռուսաստանի Առողջապահության նախարարության նախորդ առաջարկություններում առկա էր COVID-19-ով վարակված մայրերի և նորածինների մեկուսացման խնդիր, ապա, միջազգային փորձի հիման վրա, այդ ուղեցույցները փոխվել են: Այսօր խորհուրդ է տրվում մորը և երեխային միասին պահել, նույնիսկ եթե մայրը հիվանդ է», - ասել է Դմիտրի Դեգտերևը: «Այնուամենայնիվ, այս դեպքում հաստատությունը պետք է կարողանա հատկացնել անհատական բաժանմունք, որը նախատեսված է մեկ զույգի համար՝ մայր և երեխա»:
Նա նաև ավելացրել է, որ «COVID-19-ով հիվանդ կնոջը կրծքով կերակրելու կամ չկերակրելու մասին որոշումը պետք է ընդունվի համատեղ՝ բժշկի և ընտանիքի կողմից: Վտանգը, որ երեխան կրծքով կերակրելիս կարող է հիվանդանալ, փոքր է, քանի որ մայրիկի կրծքի կաթն ինքնին պարունակում է հակամարմիններ, որոնք պաշտպանում են նրան վարակից: Բայց տեղեկացված որոշում կայացնելու համար անհրաժեշտ է մոր և երեխայի կլինիկական վիճակի գնահատումը: Մոր կողմից պետք է խստորեն պահպանվեն հակահամաճարակային անվտանգության կանոնները. անհրաժեշտ է կրել պաշտպանիչ դիմակ և այն պարբերաբար փոխել, ձեռքերը պարբերաբար ախտահանել հակասեպտիկով և այլն: Երեխայի կյանքի առաջին օրերին և ժամերին մոր կաթից զրկելը նշանակում է միջամտել նրա առողջությանը և զարգացմանը:
Նյութը հրապարակման պատրաստեց Կամո Խաչիկյանը
