Սննդամթերքի տեսակներ, որոնք օգնում են դուրս բերել քաղցկեղածին տարրերն օրգանիզմից
ՀԱՍԱՐԱԿՈՒԹՅՈՒՆ
Քաղցկեղն ամենավտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս ախտաբանության զարգացմանը նպաստող հիմնական գործոններից մեկը քաղցկեղածին տարրերի վնասակար ազդեցությունն է, ուստի դրա զարգացման հավանականությունը նվազեցնելու համար հարկավոր է առաջին հերթին հնարավորինս խուսափել նման վնասակար տարրերից ու դուրս բերել դրանք օրգանիզմից։
Ուռուցքաբան Իվան Կարասևի խոսքով՝ գոյություն ունեն սննդամթերքի տեսակներ, որոնք ունակ են մաքրել օրգանիզմը քաղցկեղածին տարրերից։ Ընդ որում՝ դրանց արդյունավետությունը հաստատվել է գիտափորձերի միջոցով, ուստի նման մթերքը կանոնավոր սննդակարգում օգտագործելը կարող է օնկոլոգիական հիվանդությունների զարգացումը նվազեցնելու շատ արդյունավետ միջոց լինել։ Սա է պատճառը, որ հակացուցումների բացակայության դեպքում մասնագետը խորհուրդ է տալիս անպայման ներառել դրանք ամենօրյա սննդակարգում։
Մասնագետը ներկայացրել է սննդամթերքի այն տեսակները, որոնք կօգնեն մաքրել օրգանիզմը վնասակար քաղցկեղածին տարրերից։ Դրանց շարքին են դասվում․
Սխտորը
Այս օգտակար մթերքը պարունակում է բաղադրիչներ, որոնք պայքարում են քաղցկեղածին տարերի դեմ։ Այն, մասնավորապես, արդյունավետ է այն տարրերի դեմ պայքարում, որոնք բարձրացնում են օնկոլոգիական այնպիսի հիվանդությունների զարգացման հավանականությունը, ինչպիսին են մաշկի քաղցկեղը, թոքերի քաղցկեղն ու կոլոռեկտալ քաղցկեղը։
Բրոկոլին
Սննդակարգում այս համեղ ու օգտակար բանջարեղենի գործածությունն արդյունավետ կերպով պաշտպանում է կրծքագեղձի քաղցկեղի զարգացումից, իսկ այս հիվանդությունը համարվում է քաղցկեղի ամենատարածված ու վտանգավոր տեսակներից մեկը։
Ամբողջական հացահատիկը
Ամբողջական հացահատիկն ու ամբողջահատիկ մթերքը պարունակում են յուրահատուկ միացություններ (օրինակ՝ մանրաթելեր, ֆիտոէստրոգեններ), որոնք նպաստում են վնասակար քաղցկեղածին տարրերի դուրսբերմանն օրգանիզմից՝ այդ կերպ նվազեցնելով քաղցկեղի զարգացման հավանականությունը։
Ցիտրուսային մրգերը
Թուրինջը պարունակում է մոնոտերպեններ կոչվող միացություններ, որոնք նվազեցնում են քաղցկեղի մի շարք տեսակների զարգացման հավանականությունը։ Բացի այդ, նարնջի ու կիտրոնի մեջ պարունակվող լիմոնենը խթանում է լիմֆոցիտների ակտիվությունը, իսկ այս իմունային բջիջները ոչնչացնում են քաղցկեղի բջիջները։
Վերոնշյալ սննդամթերքի տեսակներից բացի ուռուցքաբանն այս ցանկում է ներառել նաև սնկերը, կտավատի յուղը, ծովային ջրիմուռները, լոլիկը, կանաչ թեյն ու խաղողը, ուստի դրանք սննդակարգում ներառելը ևս շատ օգտակար կլինի։
Նյութի աղբյուրը՝ medikforum.ru
