Նոր «բոբո»՝ ժողովրդին ահաբեկելու համար

Սեփական խայտառակ ձախողումները արդարացնելու համար ապաշնորհ իշխանությունն իր կառավարման ողջ ընթացքում դիմել է հին ու փորձված մեթոդի՝ մեղավորներ է նշանակում իրենից դուրս։ Եթե երեք տարի շարունակ «բոբո»-ի դերում բացառապես նախկին իշխանություններն էին, որոնց մեղադրում են հնարավոր բոլոր մեղքերում, նույնիսկ փաշինյանականների ապիկարության կամ դավադրության պատճառով պարտված պատերազմում, ապա այսօր նախկիններին նոր «մեղավոր» է գումարվել՝ Հավաքական անվտանգության պայմանագրի կազմակերպությունը։ Իշխանականների և նրանց սազանդարների տրամաբանությամբ, ՀԱՊԿ-ն է մեղավոր բոլոր ձախողումների, ապիկար կառավարման, դիվանագիտական խայտառակ ձախողումների, պետական ինստիտուտների տոտալ վարկաբեկման և ձախողման համար։

ՀԱՊԿ-ից դժգոհությունները գեներացվում են ընդհուպ վարչապետի պաշտոնակատարի մակարդակով։ Ճիշտ է, թեպետ Փաշինյանն ինքն էլ վախենում է կորցնել Մոսկվայի բարեհաճությունը, բայց նրա կողմնակիցները, հատկապես արևմտյան գրանտներով սնվող, առիթը բաց չեն թողնում տարածելու նոր »բոբո»-ի մասին քարոզչական թեզը։ Գեղցու այս խորամանկությունն աննկատ մնալ չի կարող, հատկապես անվտանգային դաշինքի գործընկերների կողմից։ Նրանք, առանց այն էլ խանդավառված չեն գործող իշխանությունների վարքից, իսկ հիմա առավել ևս այսպիսի պահվածքը խնդիրների է հանգեցնելու Հայաստանի համար։ Իհարկե, դա որևէ կերպ չի կաշկանդում Նիկոլ Փաշինյանին ու նրա կողմնակիցներին։ Այդ մարդիկ վաղուց ապացուցել են, որ միայն մի խնդիր են լուծում՝ ոչնչից չխորշելով պահպանել իշխանությունը։ Թե այդ ճանապարհին ինչ ահռելի վնաս կհասցնեն ՀՀ շահերին, գործընկերների հետ հարաբերություններին, նրանց քիչ է հուզում։

Տարոն Հովսեփյան