Քաղաքագետը բացատրել է Թուրքիայի և Հայաստանի միջև «կառավարվող թշմանության» մասին Փաշինյանի խոսքերը
ՔԱՂԱՔԱԿԱՆՈՒԹՅՈՒՆ
riafan.ru-ն գրում է, որ Երևանի ու Անկարայի հարաբերությունները ծայրաստիճան լարված են, բայց այդ «վատ խաղաղություն»-ը այնուամենայնիվ ավելի լավ է, քան «լավ պատերազմ»-ը: Այս մասին FAN- ին տված հարցազրույցում ասել է քաղաքագետ Իվան Արկատովը:
Հիշեցնենք, որ Հայաստանի վարչապետի պաշտոնակատար Նիկոլ Փաշինյանը երկրի խորհրդարանի հատուկ նիստում անկեղծ հայտարարություն է արել Թուրքիայի վերաբերյալ: Ըստ նրա` Անկարան Երևանի «թշնամին» է. դա «պատմականորեն է տեղի ունեցել» և հաստատվել է վերջին շրջանում թուրքերի գործողություններով Լեռնային Ղարաբաղում ... Միևնույն ժամանակ, Փաշինյանը նշել է, որ անհրաժեշտ է պահպանել երկու երկրների թշնամությունը «կառավարելի վիճակում»:
«Ընդհանուր առմամբ, ընդունված դիվանագիտական նորմերի տեսակետից նման հայտարարությունը կարելի է անվանել կոշտ, - ասել է Արկատովը, - այնուամենայնիվ, այստեղ պետք է հաշվի առնել Անկարայի և Երևանի հարաբերությունների համատեքստը. բոլորովին վերջերս տեղի էր ունեցել պատերազմ, որի ընթացքում թուրքերը չեն եղել հայերի կողմը, բայց 100 տարի առաջ էլ ավելի սարսափելի իրադարձություններ են տեղի ունեցել, որոնք իրենց դրոշմն են թողել տարածաշրջանում միջազգային իրավիճակի վրա»:
Քաղաքագետը շեշտել է, որ Փաշինյանը հենց այնպես չի նշել Թուրքիայի հետ թշնամությունը երկրի խորհրդարանի առջև. Հայաստանում սպասվում են հիմնական օրենսդիր մարմնի ընտրություններ, և կառավարության ղեկավարի պաշտոնակատարը ցանկանում է ներկայանալ բարենպաստ լույսի ներքո: Ըստ քաղաքագետի` Փաշինյանի այդ խոսքերը «իրեն վառ ներկայացնելու և տարածաշրջանային գլխավոր դերակատար Էրդողանին հակադրվելու» համար է, որով նա ակնկալում է ներգրավել ընտրազանգվածի այն հատվածին, որը մեծապես ցավում է Լեռնային Ղարաբաղում պարտությունից և դրանում մեղադրում է նրան:
«Չի կարելի ասել, որ այդ հռետորաբանությունը կօգնի նրան արմատապես փոխել ուժերի հարաբերակցությունը ընտրություններից առաջ, բայց դրա շնորհիվ նա կգրավի ընտրողների մի մասին»:
FAN- ի զրուցակիցը բացատրել է նաև, թե ինչո՞ւ Ադրբեջանը չի հայտարարվել թշնամի, որի հետ Հայաստանը, փաստացի պատերազմել է: Ըստ Արկատովի` դա պայմանավորված է նրանով, որ Փաշինյանը ցանկանում է Էրդողանին մեղավոր դարձնել հակամարտությունը սանձազերծելու մեջ:
«Երևանը փորձում է հարցը ներկայացնել այնպես, որ Անկարան է ամեն կերպ խրախուսել Բաքվին ագրեսիայի դիմել և հետագայում օգնել է նրան զենքով և ռազմական խորհրդականներով, - ասել է Արկատովը, - Միևնույն ժամանակ Փաշինյանը խոսում է երկրների միջև թշնամությունը «կառավարելու» անհրաժեշտության մասին: Ի՞նչ նկատի ունի դա ասելով: Կարծում եմ, որ դա վերաբերում է Թուրքիայի և Հայաստանի «սառը պատերազմ»-ը սառեցված վիճակում պահելուն, թույլ չտալուն, որ այն անցնի թեժ փուլի»:
Նյութը հրապարակման պատրաստեց Կամո Խաչիկյանը
