Չինաստանում առաջին անգամ խոստովանել են, որ իրենց պատվաստանյութը ոչ արդյունավետ է
ՀԱՍԱՐԱԿՈՒԹՅՈՒՆ
dw.com-ը գրում է, որ Չինաստանի հարավ-արևմուտքում գտնվող Չենգդու քաղաքում կայացած մամուլի ասուլիսում հայտարարություն է արել Չինաստանի հիվանդությունների վերահսկման և կանխարգելման կենտրոնի ղեկավար Գաո Ֆուն:
Կենտրոնի ղեկավարի խոսքով՝ չինական պատվաստանյութերը «պաշտպանության շատ բարձր մակարդակ չեն ապահովում»:
«Այժմ պաշտոնապես քննարկվում է այն հարցը, թե արդյո՞ք պետք է տարբեր համակցված պատվաստանյութեր օգտագործել իմունիզացիայի գործընթացում», - շեշտել է Գաո Ֆուն:
Ինչպես հաստատվել է Բրազիլիայում կլինիկական փորձարկումների ժամանակ, չինական դեղագործական Sinovac Biotech Ltd.-ի հակակորոնավիրուսային պատվաստանյութի արդյունավետությունը 50,4 տոկոսի սահմաններում է: Միևնույն ժամանակ, ըստ ընկերության տվյալների, այն 80 տոկոսով կանխում է COVID-19-ի ծանր ընթացքը: Չինական Sinopharm կորպորացիայի երկու այլ պատվաստանյութերի արդյունավետությունը 79,3 և 72,5 տոկոս է: Չինաստանի կենսաֆարմագործական հսկայի՝ CanSino-ի պատվաստանյութի համար այն կազմում է 65 տոկոս:
Չինաստանում կորոնավիրուսի դեմ պատվաստման համար օտարերկրյա դեղերի օգտագործումը դեռ հաստատված չէ:
Պաշտոնյան նաև կոչ է արել հաշվի առնել մ-ՌՆԹ տեխնոլոգիայի միջոցով ստեղծված արևմտյան պատվաստանյութերի առավելությունները:
«Բոլորը պետք է հաշվի առնեն այն առավելությունները, որոնք մ-ՌՆԹ պատվաստանյութերը կարող են տալ մարդկությանը, - ասել է Գաո Ֆուն,-մենք պետք է հասկանանք դա և չանտեսենք այն միայն այն պատճառով, որ արդեն ունենք մի քանի տեսակի սեփական պատվաստանյութեր»:
Ավելի վաղ, չինական լրատվամիջոցներում և սոցիալական ցանցերում ակտիվորեն իրականացվում էր արշավ, որի նպատակն էր կասկածներ սերմանել Արևմուտքում հաստատված պատվաստանյութերի արդյունավետության և անվտանգության վերաբերյալ: Այսպիսով, մասնավորապես, գերմանական և ամերիկյան BioNTech և Pfizer ընկերությունները մեղադրվել են իրենց կողմից մշակված պատվաստանյութերի վտանգները թաքցնելու մեջ: Այս մասին նույնիսկ Twitter-ի իր էջում գրել է պետական հեռուստաալիքներից մեկի հայտնի հաղորդավարուհին: Միևնույն ժամանակ, չինական դեղագործական ընկերությունները Fosun Pharma-ի միջոցով BioNTech-ից և Pfizer-ից իրենց պատվաստանյութերի համար բաղադրիչներ են գնել:
Նյութը հրապարակման պատրաստեց Կամո Խաչիկյանը
