Ինչով է կորոնավիրուսը վտանգավոր ապաքինվածների համար

Մարդիկ, որոնք հիվանդացել են COVID-19-ով եւ ապաքինվել են, մահվան բարձր ռիսկի են ենթարկված ախտորոշումից հետո 6 ամսվա ընթացքում, նույնիսկ եթե նրանց ախտանիշները շատ ծանր չեն եղել հոսպիտալացման համար։ Այս մասին նախազգուշացնում են Սենթ Լուիսում Վաշինգտոնի համալսարանի բժշկական դպրոցի գիտնականները: Նրանց հետազոտության արդյունքները հրապարակվել են Nature ամսագրում:

Հետազոտության հեղինակները վերլուծել են COVID-19-ով 87 000 պացիենտների եւ վերահսկիչ խմբի հինգ միլիոն մարդու տվյալները: Պարզվել է, որ նույնիսկ նրանց մոտ, ովքեր տարել են COVID-19-ի թեթեւ ձեւը, մահվան հավանականությունը մեծացել է, ընդ որում՝ վարակի բարդությանը զուգահեռ։

Ավելին, այս հիվանդության ձգձգվող հետեւանքերը կարող է տեւել երկար տարիներ կամ նույնիսկ տասնամյակներ, ուստի այդպիսի պացիենտներին համալիր բազմապրոֆիլ խնամք է անհրաժեշտ:

Ապաքինումից հետո առաջին 6 ամիսների ընթացքում մահվան ռիսկը ընդհանուր բնակչության համեմատ աճել է գրեթե 60%-ով: 6 ամիսը լրանալուց հետո COVID-19-ից բոլոր վերապրածների շրջանում ավելցուկային մահացությունը գնահատվել է 8 մարդ՝ 1000 պացիենտից: Հոսպիտալացված պացիենտների մոտ այս ցուցանիշը հասել է 39 մահվան՝ 1000 պացիենտից:

Հետազոտողների խոսքերով՝ թեեւ SARS-CoV-2-ն ի սկզբանե համարվում էր շնչառական վիրուս, երկարատեւ COVID-19-ը վտանգավոր է նրանով, որ այն կարող է ախտահարել օրգանիզմի գրեթե բոլոր օրգանային համակարգերը: