Նիկոլի և Հայաստանի պայքարում չի կարող Հայաստանն ու հայ ժողովուրդը պարտվել
ՔԱՂԱՔԱԿԱՆՈՒԹՅՈՒՆ
Հայաստանում բոլորն իրար ատում են՝ նախկինները ներկաներին, ներկաները նախկիններին, գեներալներին, հոգևորականներին, ներկաների կողմնակիցները բոլորին միասին վերցրած, այդ թվում Հայաստանը։
Նիկոլ Փաշինյանը այս կարճ ժամանակահատվածում կարողացավ հայ ազգը վերածել պառակտված սևերի ու սպիտակաների, գելերի ու գելխեղդների, սևազգեստների ու սատանաների, ֆեյքերի և ֆեյքապետերի։ Ողջ երկիրը եռում է կաթսայի մեջ։ Ճիշտն ու սխալը, երկրորդականն ու առաջնայինը, ազգայինն ու ապազգայինը, թացն ու չորն այլևս չի տարբերակվում, էական չէ։ Երկիրն ընկել է կործանարար ընթացքի մեջ ու գնում է անհայտություն, անորոշություն։ Չկա հույս, հավատ, ապագա, ինչպես ասում են՝ թունելի վերջում լույս չի երևում։ Հայաստանում հիմա միայն ավելանում են գերեզմանները։
Իշխանությունները ամեն օր խորացնում են բարոյահոգեբանական, քաղաքական և տնտեսական ճգնաժամը։ Ոչինչ չանելով, դատարկ-դատարկ խոսելով, անսահման պոպուլիզմով, ստով ու կեղծիքով լցրել են բոլոր ոլոտները, մարդկային հարաբերությունների բոլոր անկյունները, քաղաքական հարաբերությունների բոլոր մակարդակները։ Բանակի, եկեղեցու, ընտանիքի, անհատի, քաղաքացու ինստիտուտների կազմաքանդումը դարձել է պետական քաղաքականության հիմնական ուղղությունները։ Չկան ներդրումներ, չկա զարգացում, չկա օրակարգ, որի շուրջ երկիրը կշտկեր մեջքը, պատերազմից ստացած վերքերը կբուժեր։ Փոխարենը երկրի ղեկավարի մակարդակով հերթական ստի, կեղծիքի, պոպուլիզմի չափաքանակն է ներարկվում հասարակական և քաղաքական հարաբերություններում։ Սուտ, սուտ, սուտ, անվերջ սուտ ու կեղծիք, անվերջ մեղավորների նշանակում, չարվածի մեղքն ուրիշների վրա դնելու ամոթալի վարքագիծ։
«Հպարտ ու դուխով» վարչապետը երկրի ներսում ճղում է բոլորին, երկրից դուրս խեղճանում ու Հայաստանի ու հայ ժողովրդի շահերի հետ կապ չունեցող օրակարգեր առաջ տանում, ավելի ճիշտ՝ այդ օրակարգերի հետ խոնարհ ձևով համաձայնվում։ Սա է այսօր մեր երկրի պատկերը։ Ու այս վիճակով գնում ենք ընտրությունների, որի ցանկացած ելք հղի է ցնցումներով ու բախումներով։
Նիկոլ Փաշինյանը խաղաղ ու անցնցում չի հեռանալու։ Դա իր տեսակն է, իր բնավորությունն ու արժեհամակարգը։ Եզրակացությունը մեկն է՝ հայ ժողովուրդն ապրում է իր պատմության ամենաողբերգական ու ամենաամոթալի էջերից մեկը, սակայն պետք է շտկի իր մեջքը, քանի որ Նիկոլի և Հայաստանի պայքարում չի կարող Հայաստանն ու հայ ժողովուրդը պարտվել։
Կարեն Դանիելյան
