Ո՞ր դեպքերում է գլխացավը հուշում անհապաղ բժշկին դիմելու անհրաժեշտության մասին

Գլխացավն ամենատարածված խնդիրներից է, որը մարդիկ սովորաբար մեղմում են ցավազրկող դեղորայքի միջոցով, սակայն մասնագետները հաճախ են շեշտում, որ ցավի պատճառը պարզելը շատ կարևոր է, քանի որ երբեմն այն նախազգուշացնում է շատ վտանգավոր խանգարումների մասին, որոնք անտեսելը կարող է ճակատագրական լինել։ Նման խնդիրներից խուսափելու համար հանրահայտ ռուս բժիշկ Ալեքսանդր Մյասնիկովը նշել է գլխացավի այն տեսակները, որոնց առկայության դեպքում հարկավոր է անհապաղ դիմել բժշկին։ 

Մասնագետի խոսքով՝ առաջին հերթին չի կարելի անուշադրության մատնել գլխացավը, որն ի հայտ է գալիս կամ ուժգնանում է հազի կամ մարմնի դիրքը փոխելու դեպքում։ Բանն այն է, որ այդ կերպ օրգանիզմը կարող է նախազգուշացնել հավանական ուռուցքի կամ գլխուղեղում անոթալայնանքի (անևրիզմ) մասին, ինչն անտեսելը կարող է շատ վտանգավոր լինել։ Այս խանգարումը դրսևորվում է անոթի ախտաբանական արտացցմամբ, որի դեպքում բարձր է դրա պատռվածքի ու արյունազեղման հավանականությունը։

Բացի այդ, մասնագետը խորհուրդ է տալիս դիմել բժշկին նաև ձեռքերի անսպասելի թմրածությամբ կամ շուրթերի ծայրերի իջեցմամբ ուղեկցվող գլխացավի դեպքում, որը կարող է հուշել կյանքի համար վտանգավոր նյարդաբանական խանգարումների մասին։ Նման ախտանշանների առկայության դեպքում հարկավոր է անհապաղ դիմել մասնագետին ու ոչ մի դեպքում չզբաղվել ինքնաբուժությամբ, քանի որ ճիշտ բուժման ուշացումը կարող է ճակատագրական լինել։