Առողջական ինչ խնդիրների դեմ է պայքարում քրքումը․ համեմունքի գործածության 5 միջոց

Քրքումն ամենատարածված ու յուրահատուկ համեմունքներից մեկն է, որը մարդիկ կիրառում են ուտեստներին կամ ըմպելիքներին յուրահատուկ համ հաղորդելու համար, սակայն քչերին է հայտնի, որ այս համեմունքը ոչ միայն շատ համեղ է, այլև անչափ օգտակար։ Այս նարնջագույն համեմունքի օգտակարությունը գիտնականները կապում են դրանում պարունակվող միացությունների՝ քրքումինոիդների հետ, որոնցից ամենակարևորը քրքումինն է՝ քրքումի հիմնական բաղադրիչներից մեկը։ Հետազոտությունները ցույց են տվել, որ քրքումն ամրապնդում է իմունային համակարգն ու օգնում է պայքարել մի շարք խնդիրների դեմ, ուստի զարմանալի չէ, որ հակացուցումների բացակայության դեպքում մասնագետները հորդորում են ամեն օր ներառել այն սննդակարգում կամ կիրառել հատուկ դեղամիջոցների տեսքով։

Medikforum.ru կայքը ներկայացրել է քրքումի ամենաօգտակար հատկություններն ու նշել մի քանի գիտականորեն ապացուցված պատճառ այն ամենօրյա սննդակարգում ներառելու համար։

Նվազեցնում է քաղցկեղի զարգացման հավանականությունը

Գիտնականները պարզել են, որ այս համեմունքի գլխավոր բաղադրիչներից մեկը՝ քրքումինը, կարող է նպաստել քաղցկեղի աճի, զարգացման ու տարածման ճնշման։ Այն, մասնավորապես, օժտված է անգիոգենեզը՝ ուռուցքներում նոր արյունատար անոթների աճի գործընթացը ճնշող հատկություններով, ինչն էլ զրկում է դրանց անհրաժեշտ սնուցումից ու հանգեցնում է բջիջների մահվան։ Բացի այդ, կան տվյալներ այն մասին, որ քրքումինը խոչընդոտում է մարսողական համակարգի օրգանների քաղցկեղի զարգացմանը։ 30 օր տևած հետազոտությունը, որին մասնակցել է աղիների ախտահարմամբ ու դրանց չարորակացման բարձր ռիսկով 44 տղամարդ, ցույց է տվել, որ քրքումինի ամենօրյա ընդունումը նվազեցնում է նման ախտահարումների քանակը 40 տոկոսով։

Բարելավում է սրտանոթային համակարգի առողջական վիճակը

Բացի այդ, գիտնականներն ապացուցել են նաև, որ քրքումինի շնորհիվ այս համեմունքը կարող է բարելավել արյունատար անոթների ներքին շերտի բջիջների՝ էնդոթելերի գործառույթները, իսկ այս շերտի դիսֆունկցիան էլ համարվում է սրտային հիվանդությունների ու զարկերակային ճնշման և արյան մակարդաման գործառույթները կարգավորող մեխանիզմների խանգարման հիմնական պատճառը։

Պաշտպանում է գլխուղեղի հիվանդություններից

Նման հիվանդություններից շատերը կապված են լինում գլխուղեղի նեյրոտրոֆիկ գործոնի (BDNF)՝ աճի հորմոնի մակարդակի նվազման հետ, մինչդեռ գիտնականներն ապացուցել են, որ քրքումինը բարձրացնում է գլխուղեղում BDNF-ի մակարդակը, ինչի շնորհիվ կարող է հետաձգել կամ առհասարակ կանխել գլխուղեղի հիվանդությունների զարգացումը։

Պաշտպանում է հոդերը

Քրքումինը բավական հզոր հակաբորբոքային միացություն է, ուստի կարող է շատ արդյունավետ լինել արթրիտով պայմանավորված հոդերի բորբոքման դեմ պայքարում։ Ռևմատոիդ արթրիտով հիվանդների մասնակցությամբ հետազոտությունը ցույց է տվել, որ քրքումինը կարող է նույնիսկ ավելի արդյունավետ լինել քան հակաբորբոքային դեղամիջոցները։

Հակազդում է ընկճախտին

Գիտնականների կարծիքով՝ քրքումինի գործածությունն այս հոգեկան հիվանդության զարգացման դեմ պայքարում կարող է բավական խոստումնալից լինել։ Ընկճախտով հիվանդ 60 մարդու մասնակցությամբ հետազոտությունը ցույց է տվել, որ քրքումի հիմնական բաղադրիչի գոծածությունը վեց շաբաթվա ընթացքում հանգեցնում է առողջական վիճակի զգալի բարելավման և իր ազդեցությամբ բավական նման է պրոզակի գործածության դեպքում նկատվող ազդեցությանը։

Այս համեմունքը կարող է իսկապես շատ լավ ազդեցություն ունենալ ընդհանուր առողջական վիճակի վրա՝ օգնելով կանխել մի շարք հիվանդությունների զարգացումը կամ նպաստելով դրանց բուժմանը, սակայն մասնագետները, այնուամենայնիվ, նախազգուշացնում են, որ ցանկացած դեպքում հարկավոր է հետևել դրա չափաբաժնին ու չչարաշահել այն, քանի որ հակառակ դեպքում մեծ է կողմնակի բարդությունների զարգացման հավանականությունը։ Առողջապահության համաշխարհային կազմակերպության մասնագետները հորդորում են չգերազանցել քրքումինոիդների օրական թույլատրելի չափաբաժինը, որը մարմնի յուրաքանչյուր կիլոգրամի դիմաց կազմում է 3 մգ, ուստի մինչ քրքումով դեղորայք ընդունելը հարկավոր է անպայման խորհրդակցել բժշկի հետ ճիշտ չափաբաժինը որոշելու և ինքնաբուժության հետևանքով օրգանիզմին էլ ավելի մեծ վնաս չհասցնելու համար։