Ընդդիմադիր դաշտում գործող իմ գործընկեր ուժերի մեջ որևէ հակասություն այս պահին չեմ տեսնում. Արսեն Բաբայանը՝ Միքայել Մինասյան-Ռոբերտ Քոչարյան հակասությունների մասին
ՔԱՂԱՔԱԿԱՆՈՒԹՅՈՒՆ
«Հայրենիք» կուսակցության խորհրդի անդամ Արսեն Բաբայանն, ArmDaily.am-ի հետ զրույցում անդրադառնալով Միքայել Մինասյանի կողմից ընդդիմության հասցեին արված հայտարարություններին, ասաց, որ «Հայրենիքի փրկության շարժումը» միայն քաղաքական պայքար չէ՝ վերքաղաքականն պայքար է՝ հայրենիքը փրկելու պայքար:
Մեր այն հարցին, թե Միքայել Մինասյանը կարող է հավակնել հաղթանակի այս արտահերթ ընտրություններում, ինչպես ինքն էր ասել, Բաբայանն ասաց. «Ընդդիմադիր դաշտում գործող իմ գործընկերների վերաբերյալ կոռեկտ չեմ համարում մեկնաբանություն տալը, հատկապես եթե հարցը կապված է նրանց մասնակցելու և հաղթելու հետ: Գիտեմ մի բան, որ իշխանությունը չունի ընդհանրապես հեղինակություն և եթե տեղի ունենա ընտրություններ՝ իշխանությունը չի հաղթելու: Ընդդիմադիր մեր բոլոր գործընկերներին, բոլորին, մաղթում եմ մեծ հաջողություն, որպեսզի բոլորը միասին կարողանան դուրս շպրտել այս չարիքը մեր երկրից»:
Անդրադառնալով Մինասյանի՝ Գլխավոր Շտաբի վրա Փաշինյանի հետ բերած ազդեցության ու դրա շնորհիվ ընտրությունների ժամանակ քվեներ ապահովելու մասին հայտարարությանը, Բաբայանն ասաց, որ Փաշինյանը բանակից քվեներ չի ստանա:
«Ես վստահ եմ, որ բանակից այս իշխանությունը ձայն չի ստանալու կամ ստանալու է երկու-երեք ձայն՝ ոչ ավել, ամբողջ բանակից: Ես դրանում համոզված եմ և ընդհանրապես մյուս ուժային կառույցներից ևս, որովհետև և բանակում, և ուժային կառույցներում միջին և միջինից ցածր օղակներում, չնայենք բարձրագույն հրամանատարական կամ ղեկավար անձնակազմին, հատկապես վարչապետի պաշտոնը զբաղեցնող անձի նկատմամբ որևէ հարգանք, որևէ հեղինակություն չունի: Մարդիկ հասկանում են, որ ուսադիր կրող մարդու հրամանատարը չի կարող լինել ստախոս, պարբերաբար փախուստի դիմող այնպիսի մեկը, որն այսօր զբաղեցնում է վարչապետի աթոռը: Ես ունեմ համոզմունք, որ թե բանակը և թե մնացած ուժային կառույցները, մեկ բառով ասած, ուսադիր կրող սպաները, զինվորները, ուսադիրավորները, նրանք ձայն չեն տալու այս իշխանությանը և հատկապես այս իշխանության պարագլխին: Մարդիկ պետք է հասկանան, որ այս իշխանությունը թուրքական իշխանության հայաստանյան ներկայացուցչությունն է»,-նկատեց Բաբայանը:
Մինասյանի վերջին հարցազրույցից հետո շատերը այն կարծիքը հայտնեցին, որ Քոչարյանի ու Մինասյանի միջև հակասություններ կան ու դա է պատճառը, որ ընտրություններում Մինասյանը չի աջակցում Քոչարյանին: Այս դիտարկմանն ի պատասխան Արսեն Բաբայանն ասաց. «Ես այլ քաղաքական ուժերի և հատկապես իմ գործընկեր ընդդիմադիր դաշտում գործող ուժերի մեջ որևէ հակասություն այս պահին չեմ տեսնում»:
